“ЦАГИЙН ӨНГИЙГ ТАНИГЧ НЬ АРУУХАН БУЮУ”
Хятадад #30 000 монгол хонь# үнэхээр тренд болж байна. Түүний цаана хятадын жирийн иргэдийн баяр талархлаа илэрхийлсэн сэтгэгдэл усны урсгал мэт хөвөрч байгааг өгүүлэх юун. Өнөө өглөө компьютерээ асаагаад харахад нүд эрээлжлэмээр олон сэтгэгдлүүд мянга түмээрээ харагдах ажээ. Тэр дундаас онцгой анхаарал татсан сэтгэгдлүүдийг түүвэрлэн хүргэсү.
“三羊开泰” хэмээх хэлц үгийг олон хүн дурджээ. Энэ нь “Гурван хонь энх дүүрэнг бэлгэдмүй” хэмээх Зурхайт номоос гаралтай үг юм. Тэр утгаар авч үзвэл Монголын 30 мянган хонь сайн сайхан цагийг бэлгэдэж аюулт хижиг тахлын халдвар амирлах болтугай гэсэн санааг илэрхийлэн бичицгээсэн хэрэг.
“Цагийн өнгийг танигч нь аруухан баатар буюу” гэж бичээд орхичихсон нэг хүн байх юм. Бичгийн хэлний боловсрол сайтай хүмүүс энэ үгийн утга учрыг сайтар ойлгож байгаа байх аа.
Хонины мах чалх тэнхээ сайжруулдаг. Тийм болохоор Уханьд байгаа зовж зүдэрсэн хүмүүс рүүгээ түүнийг илгээх юм шүү гэж маш олон хүн бичсэн байна. “30 000 хонины дэлхий дахины ач холбогдол ийм их байна гэж бодсонгүй. Энэ бэлгийг мөнгөөр үнэлэх аргагүй юм.” гэж нөхөр бичжээ.
“Манай Хятад улсын эдийн засгийн хүчин чадал САРС-ын үеийнхээс 10 дахин илүү өссөн. Бидэнд дутаж гуцаад байх зүйл юу байх билээ? Гагцхүү анд нөхдийн энэ мэт халуун сэтгэл л хамгаас дутаж байсан бус уу? Баярлалаа Монгол улс” гэсэн бичлэг бас байх юм.
“30 000 мянган хонь гэдэг бол үнэхээр том бэлэг. Гэхдээ миний санахад Монголын ерөнхийлөгчийн энэ хонин бэлэгний цаана өөр нэг том далд санаа агуулагдаж байж мэдэх юм. Орос Хятадын хийн хоолойг Монголоор дамжуулах асуудал дээр Оросууд зөвшөөрсөн байр суурьтай байгаа. Харин манайх цааргалсан байдалтай байгаад байсан. Тэр байдлыг эергээр шийдүүлэхэд энэ 30 мянган хонь том түлхэц болно байх аа. Монголоор хийн хоолой дайруулахад гурван талд аль алинд нь ашигтай шүү дээ. Тэр дундаа Монгол улсын нийслэл утаанаас салах боломжтой болно.” гэж айхтар дүгнэлт гаргасан хүн ч байна.
