Монголын Үндэсний худалдаа аж үйлдвэрийн танхимын ерөнхийлөгч О.Амартүвшин нар өнөөдөр сэтгүүлчидтэй уулзаж, мэдээлэл өгсөн.
Энэ үеэр Майн баяр буюу тавдугаар сарын 1-нд Сүхбаатарын талбайд жагсаал зохион байгуулахаар төлөвлөж байгаагаа хэлсэн байна. Энэхүү жагсаалд 1000 гаруй бизнес эрхлэгч оролцуулахаар болжээ.
Тэрээр, “Коронавирусийн эрсдэлтэй нөхцөлд Засгийн газраас авч хэрэгжүүлж байгаа арга хэмжээ төдийлөн байгаа олохгүй байна. Бид саналаа удаа дараа илэрхийлсэн боловч ажил хэрэг болгосон нь цөөн. Байдал энэ хэвээрээ үргэлжилбэл олон аж ахуйн нэгж хаалгаа барьж, иргэд ажилгүй болж, Монголд ядуурал нүүрлэнэ. Бидний гаргасан судалгаагаар нийт аж ахуйн нэгжүүд ажилтнуудынхаа 30 хувийг цомхотгох гээд бэлдчихсэн байна. Иймээс бид Засгийн газарт шаардлагаа тавьж, Сүхбаатарын талбайд тайван жагсаал зохион байгуулах гэж байгаа” гэж хэлжээ.
Түүнээс “Та нар зөвшөөрлөө авсан юм уу. 1000 гаруй хүн цуглуулж хийнэ гэвэл зөвшөөрөхгүйн дээр халдвар тархах аюултай. Зохион байгуулж байгаа хүмүүст ч хариуцлага тооцох асуудал ярих байх” гэж сэтгүүлчид асуухад “Одоо тэр хамаагүй. Удаан хүлээлээ, энэ байдал цаашид үргэлжилбэл олон хүн ажилгүй болно шүү дээ” гэж хариулсан байна.
О.Амартүвшин нь UFC группийн ерөнхийлөгч бөгөөд 2016 оны сонгуульд Ардчилсан намаас нэр дэвшиж байлаа. Түүнтэй МҮХАҮТ-ийн ерөнхийлөгчийн албан тушаалд МАН-аас Ч.Ганхуяг, Урбанек Лхагважав нар өрсөлдсөн юм.
