Улсын онцгой комиссын Шуурхай штабаас мэдээлэл хийлээ. Тусгай үүргийн нислэгийг Сөүл, Франкфуртын чиглэлд үйлдэхээр болсон. Тусгай үүргийн онгоцонд ямар иргэдийг хамруулж байгаа талаарх мэдээллийг өглөө. Манай улс нөөц боломждоо тааруулж гадаадад байгаа иргэдээ үе шатдаа авчирч байгаа учраас Элчин сайдын яамдын гадаа жагсаал цуглаан хийж, замбараагүй байдал үүсэхгүй байхыг Шуурхай штабаас анхаарууллаа.
-Гадаад харилцаан яамны Консулын газрын дарга Л.Мөнхтүшиг: “Тусгай үүргийн гурван онгоцоор гадаадад байгаа иргэдээ авах бэлтгэлийг хангаад байна. Нийтдээ эдгээр гурван нислэгээр 790 гаруй иргэн эх орондоо ирнэ. Авчрах иргэдийн нэрсийг эцэслэх ажил явагдаж байна. Иргэдийг сонгох асуудал дээр маш их маргаан явж байна.
УОК-оос гаргасан шийдвэрээр АНУ, Зүүн Өмнөд Ази болон Европт байгаа иргэдийг татан авах үүднээс Инчеон онгоцны буудлаас зөвхөн транзит зорчигчдыг авах нислэгийг хийхээр болсон.
1. Дөрөвдүгээр сарын 30-нд Сөүл-Улаанбаатар чиглэлийн нислэгээр долоон улсаас дамжиж ирж байгаа 273 иргэнээ авчирна. Зорчигчийн ангиллыг танилцуулбал, эрүүл мэндийн шалтгаантай 23, жирэмсэн 10, өндөр настан асран хамгаалагч нь хамт явж байгаа 24, хөгжлийн бэрхшээлтэй хоёр, бага насны хүүхэдтэй гэр бүл 26, хүндэтгэн үзэх бусад шалтгаан гэдэг 15 хувийг эзэлж байгаа.
2. Тавдугаар сарын 1-нд Сөүл-Улаанбаатарын чиглэлээр зөвхөн Солонгост байгаа 271 иргэнийг авчирна. УОК-оос тавьж байгаа таван шаардлагаас гадна БНСУ-ын Хууль зүйн яамнаас визийн хугацаа хэтрүүлж, саатуулах байранд байгаа 33 иргэнээ авахыг Монгол Улсаас шаардаж байгаа. Үүнээс гадна визийн хугацаа хэтэрч, өршөөлийн сардаа буцвал дахин виз мэдүүлэх боломжтой болдог. Энэ арга хэмжээнд хамрагдаж байгаа 200 гаруй иргэнээс боломжоороо татан авах Солонгосын талын хүсэлтийг авч үзэхээс өөр аргагүй байгаа. Ангилаад харвал, эрүүл мэндийн шалтгаантай 23, жирэмсэн 13, өндөр настан асран хамгаалагчтай тав, хөгжлийн бэрхшээлтэй долоон, баг насны хүүхэдтэй гэр бүл 20, хүндэтгэн үзэх шалтгаантай оюутан сурагч 20 хувь, саатуулагдсан иргэд 12 хувийг эзэлж байгаа.
3. Тавдугаар сарын 2-нд Франкфурт-Улаанбаатарын чиглэлд 13 улс орноос дамжин ирэх 263 иргэнийг авчирна. Ангилал нь, оюутан сурагч 23, эрүүл мэндийн шалтгаантай 12, жирэмсэн 15, өндөр настан асран хамгаалагчтай 20, хөгжлийн бэрхшээлтэй нэг, бага насны хүүхэдтэй гэр бүл 29 хувийг эзэлж байгаа.
Ямар иргэдийг онгоцонд суулгахаар сонгоод байгаа юм бэ?
Энэ асуултад хариулт өгье. Юуны өмнө нийгмийн сүлжээгээр 86 нас хорт хавдартай иргэнийг авахгүй байна гэж шүүмжлээд байгаа. 86 настай иргэнийг авчирна гэдгийг албан ёсоор хэлье. Сөүлээр Америк, Азиас дамжин ирэх иргэдийн хүсэлт нийтдээ 9000 болсон байна. Үүнээс АНУ болон Австралид байгаа монгол иргэдийн хүсэлт 3000 гаруй болсон. Эдгээр иргэнээс УОК-ын тавьсан таван бүлэгт хамаарах иргэдийн ангиллыг Элчин сайдын яамнаас авахад Сөүлээс ирэх транзит нислэгт 1174 хүн шаардлага бүрэн хангаж байгаа. Гэтэл эдгээр иргэнээс 273 зорчигчийг яаж сонгон шалгаруулж, нэрсийг эцэслэх вэ гэдэг маш хүнд ажил УОК-ын Шуурхай штабт оногдож байгаа. Зорчигчийг сонгох Ажлын хэсэгт, ГХЯ, ЭМЯ, ОБЕГ, ЦЕГ, ТЕГ, Шадар сайдын ажлын алба, ЗГХЭГ, МХЕГ-ын төлөөллүүд багтсан. Ажлын хэсэг 24 цаг сууж ажиллаж байна. Зөвхөн 60-аас дээш настай өндөр настны тоо гэхэд л 356 буюу бүтэн нэг онгоц дүүрэхээр байсан. Жирэмсэн хүмүүсээс маш хэцүү сонголт хийж байна. Хоёр сартай жирэмсэн хүнийг авчрах уу, зургаан сартай жирэмсэн хүнийг авчрах уу, 80 настайг нь авах уу, 70-тайг нь авах уу, хорт хавдрын нэгдүгээр шатанд байгаа хүнийг авах уу, сүүлийн шатанд орсон хүнийг авчрах уу гэдэг маш хэцүү сонголттой тулсан. Мэргэжлийн байгууллагуудтай ярилцаж байгаад аль нэгийг сонгож байгаа юм. Эрүүл мэндийн шалтгаантай гэдэг өргөдлийг бүртгүүлсэн бүх хүн өгсөн байна. Эдгээр хүмүүсээс сонгохдоо эрүүл мэнд шинжилгээний баримт дүгнэлтийг шалгаж, хуурамчийг нь илрүүлж хасалт хийсэн.
86 настай хүнийг яагаад авсангүй гээд шүүмжилсэн. Тэр иргэнийг авчрахаар болсон. Гэхдээ тэр иргэнийг авчирснаар цаана явах шаардлагаа хангасан нэг хүн хасагдаж байгаа. Нэг хүнийг баярлуулж байгаа ч нөгөө нь гомдоод бухимдаад үлдэж байгаа. Ийм хүнд сонголтуудыг Шуурхай штаб хийж, иргэдийн нэрийг албажуулж МИАТ компанид өгсөн. Сонгогдсон иргэдэд Элчин сайдын яамаар дамжуулж мэдэгдэж байгаа.
Мөн нислэг үлдэхтэй холбоотой асуудлууд гарч байна. Инчеон олон улсын нисэх буудал транзит нислэг хоорондын зайг 24 цагаас илүүгүй байхаар тогтоосон. Олон иргэн транзит зааланд ирээд олон хоног гацаж байгаа. Тухайн иргэд гаднын улсаас халдвар зөөвөрлөн оруулж ирэх эрсдэлтэй гэж Солонгосын тал үзэж байгаа. Тиймээс гадаад улсын дамжин өнгөрөх иргэд дээр хатуу шаардлагууд тавьж байна. Зөвхөн Солонгост байнга оршин суух эрхтэй хүмүүсийг нэвтрүүлж байгаа. Үүнтэй холбоотойгоор 24 цагт багтахгүй байгаа иргэд тусгай нислэгээс хасагдсан. Энэ болгонд дараагийн ямар хүнийг нөхөж оруулах вэ гэдэг ажлууд одоо хүртэл хийгдэж байна.
Хэн нэгэн албан тушаалтан өөрийнхөө хүсэл үзэмжээр асуудлыг шийдээгүй гэдгийг хариуцлагатай хэлмээр байна. Тусгаарлах байр, нисэх багийн хүчин чадал зэргээс хамаарч тусгай үүргийн нислэгийг тодорхой давтамжтай явуулж байгааг иргэд зөв ойлгох хэрэгтэй” гэлээ.
