Ц.Сандуй нар сонгуульд ялах юм бол төрийн албан тушаалыг арилжиж, намдаа 60 тэрбум төгрөгийн санхүүжилт босгох тухай ярьснаасаа болж буруудаж, улс төрийн кареараа дуусгаж, ялын тогтоол хүртэл уншуулсан. Уг нь намдаа том гавьяа байгуулж, санхүүжилт олж ирэх гэж байсан хүн. Гэвч Үндсэн хууль болоод бусад дагалдах хуульд зааснаар “төрийн эрхийг хууль бусаар авах, авахыг завдах” нь хориотой учир тэд ийнхүү адлагдаж байна.
Төрийн байгууллагын ахлах мэргэжилтнээс эхлээд төрийн нарийн бичгийн дарга хүртэл тусгай үнэ ханштайгаар худалдан борлуулагдана гэдэг яавч байж болохгүй үйлдэл юм. Гэвч үүнээс “аймаар” схемийг С.Эрдэнэ даргатай Ардчилсан нам боловсруулж, ирэх сонгуульд оролцох гэж байна.
Юун 60 тэрбум, сошиал хуудаснаа цацагдаж буй мэдээллээс харвал 60 тэрбум цаашаа санагдлаа…
С.Эрдэнэ сонгуульд нэр дэвших хүсэлтэй намын гишүүдээсээ эхний ээлжинд 100 сая төгрөгийн дэнчин гэгчийг авч байна гэх дуулиан цацагдсан. Ардчилсан намын гишүүд ч ийм дэнчин өгсөн гэдгээ баталж, мэдэгдээд байгаа. Гэвч цаашид нэр дэвших эрх болоод онилсон тойргоо өөрийн болгохын тулд дахин мөнгө төлөх шаардлага өнөөх горилогчдод үүслээ. Өөрөөр хэлбэл 100 сая + 200 сая + 400 сая … гэхчлэнгээр мөнгөтэй хүн л Ардчилсан намаас нэр дэвших эрх олж авах юм байна гэх хардлагыг баталгаажуулж байна.
Энэ бол аюул. Мөнгөө төлж байгаад албан тушаал авдгаас ч илүү аюул юм. Нэгэнтээ намдаа болоод тойрогтоо ихээхэн хэмжээний мөнгө хаясан нэр дэвшигч аз таарч, иргэдийн итгэлийг авч, УИХ-ын гишүүнээр сонгогдмогцоо л шархаа нөхөж эхэлнэ биз дээ.
ЖДҮ, концесс зэрэг хяналт багатай, эрх мэдэл албан тушаалаа ашиглан дуртай үедээ гар дүрж болох бүхнийг цөлмөж эхэлнэ. Үүгээр ч зогсохгүй хэд хэдэн 60 тэрбум ч үүсч болох эрсдэлтэй. Нэгэнтээ гишүүн болж эрх мэдэлд хүрсэн хүн аль нэг төрийн байгууллагад өөрийн хамаарал бүхий хүмүүсийг суулгахыг зорино, Засгийн газрын ямар нэгэн сайд болохыг хүснэ, төрийн өмчийн компаниудад бэлгэвч, бал зэргээс эхлээд л өч төчнөөн бараа бүтээгдэхүүнийг зах зээлийн ханшнаас хэт дээгүүр үнэлгээгээр шахна…
Яагаад үгүй гэж вэ.
Ийм л зүйл хүсч л тэд намдаа, тойрогтоо 100 сая + 200 сая + 400 сая… –аар нь цацаж байгаа. Түүнээс нээх эх орончдоо, ард түмнийг бодсондоо мөнгө цацаад явна гэдэгт бол худлаа шүү. Одоо цагт энхрий хайртай нам минь гээд мөнгө бариад гүйгээд хүн олдохгүй. Олдсон ч ашиг сонирхол өвөртөлсөн нэгэн л байх биз. Тэгвэл намдаа 100 саяыг тушаагаад байгаа зуу, зуун хүн дараагийн төрийн эрхийг хууль бусаар авах, авахаар санаархаж буй онц ноцтой гэмт хэрэг үйлдэж байгаа нь гарцаагүй…
Тиймээс өмнөх 60 тэрбумаас ч илүү аюул тарьж мэдэх, С.Эрдэнэгийн боловсруулсан Ардчилсан намын “аймаар” схемийг хэрэгжиж эхлэхээс нь өмнө татан буулгаж, хариуцлага нэхмээр байна.
А.Аюуш
