АН-ын Үндэсний бодлогын хороо өнөөдөр хуралдаж, 2020 оны УИХ-ын сонгуульд нэр дэвших хүмүүсээ тодруулна. АН-ын ҮБХ-ны хуралд оролцохоор ирсэн УИХ-ын гишүүн Я.Санжмятаваас цөөн асуултад тодруулга авлаа.
-Танай нам нэр дэвшигчиддээ ямар шаардлага тавьж байна вэ?
-Шаардлага хангасан маш олон хүн бий. Үндэсний бодлогын хорооноос байгуулсан комисс нэр дэвшихээр горилогчдыг нарийвчлан судална. Рэйтингийн судалгааг мөн үзнэ. Эх орны өнцөг булан бүрд байгаа ард түмний санал бодлыг бид харгалзан үзнэ. Ингээд 76 шилдэг хүмүүсээ сонгохгүй бол улс эх орны эдийн засаг, тулгамдсан асуудал, айл өрхийн амьдрал гээд АН-ыг түшихгүй бол, АН-г сонгохгүй бол болохгүй нь гэсэн олон хүний хүлээлтийг бид тайлах болно.
Олон шаардлага бий. Судалгаагаар өндөр үнэлгээ авсан, залуучуудын хүсэлт, улс орны өнөөгийн нөхцөл байдлыг үзэхэд Үндсэн хуулийн нэмэлт өөрчлөлтийг баталсан, төрийн бодлогыг зохицуулахад заавал парламентад биш нам дээр магадгүй Засгийн газарт илэрхийлэх олон нөхцөл байдал байгаа учраас одоогоор шийдлээ гаргаагүй байна.
-Та Завхан аймгаас нэр дэвших үү?
-Одоогоор шийдвэр гараагүй байна. Намайг Завхан, Эрдэнэт, Дархан-Уул, Улаанбаатарт нэр дэвшээч гэсэн. Хэрэв нэр дэвшихээр бол Завхан аймагтаа очихгүй бол 20 жил намайг хүн болгож, төрд зүтгүүлснийхээ төлөө урваж, шарвавал Завханы ард түмэн гомдох болно.
-Ардчилсан нам дотроо эвлэлдэж чадсан уу?
-Манай нам шиг эвтэй нам байхгүй байна шүү дээ. Янз бүрийн хэвлэл мэдээллээр хагарсан бутарсан, бие даасан гээд байсан, буцаад л хүрээд ирж байгаа биз дээ. Намын туга дор олуулаа цугласан.
