Шадар сайд Ө.Энхтүвшин, Эрүүл мэндийн сайд Д.Сарангэрэл нар Улаанбаатар хотын Төв цэвэрлэх байгууламжийн үйл ажиллагаатай танилцлаа.
Тухайлбал, шинээр баригдаж буй цэвэрлэх байгууламжийн ажлын явц, 2018-2019 онд БХБЯ-аас хэрэгжүүлсэн лагийг цэвэрлэж, үнэргүйжүүлэх төслийн гүйцэтгэл, тулгамдаж буй асуудлууд болон лаг усгүйжүүлэх байгууламж дотор үнэр арилгах технологийн туршилттай танилцсан байна.
Шинэ цэвэрлэх байгууламж барих БНХАУ-ын инженер техникийн ажилтан ирэх боломжгүй учраас онлайнаар хуралдаж байгаа аж. Тиймээс ажил нэлээд хоцрогдолтой явж байгаа талаар танилцууллаа. Шинэ цэвэрлэх байгууламж ашиглалтад ортол лагийг 70 хувь хүртэл усгүйжүүлэн цэвэрлэж байгаа аж. Үүнд 10 тэрбум төгрөг хэрэгтэй бөгөөд Улаанбаатар хотоос хоёр, Засгийн газраас найман тэрбумын санхүүжилтийг шийдсэнээр лагийг цэвэрлэх боломж бүрдэх юм байна.
Шадар сайд Ө.Энхтүвшин: Цэвэрлэх байгууламжид найман тэрбум төгрөгийн асуудлыг Засгийн газрын хуралдаанд оруулан яаралтай шийдэж өгөх хэрэгтэй юм байна. Шинэ цэвэрлэх байгууламжийн үндсэн барилгын ажлыг түргэвчлэх шаардлагатай байгаа. Үүний тулд инженер техникийн ажилтнуудыг Хятадаас оруулж ирэх хэрэгтэй. Хэрвээ оруулж ирэхгүй бол шинэ цэвэрлэх байгууламж барих ажил зогсонги байдалтай байна” гэлээ.
