Өглөө 10 дугаар хорооллын автобусын буудлаас ногоон автобусанд түрүүлж гүйж ороод хоёр давхар руу зүтгэчихлээ. Хянагч бололтой аалины хайлан, хариуцлагын эзэн болсон маск зүүсэн махтай шөлтэй шар эгч их уриалгахнаар зохицуулагч хийж байна./Тэрний яриа хөөрөө ааш зан биеийн бүтэц яг надархуу/ ярина ч гэж янзын юм аа “Болгоомжтой буугаарай, болгоомжтой гараарай, бариулаасаа бариарай, зогсохоор нь буугаарай, дээд давхарт хүн зогсох хориотой, савлах магадлалтай, цонхоо хаагаарай модны мөчир ороолгоно” гэх мэтээр байнга анхааруулсаар буудал болгон дээр зохицуулагч хийж, хүмүүсийг дээш доош бууж суухад нь чиглүүлнэ.
Хянагч эгчтэй яриа нийлж хэсэг зуур ярилаа. Тэрбээр “Шөнө 01 цагт гэртээ хариад өглөө 04 цагт А тэргээр бааз дээрээ ирсэн. Өнөө өглөө бааз дээр телевизийн зураг авалттай байлаа бид өчигдөр шөнө болтол цэвэрлэгээ хийсэн. Зарим хүмүүс шагнууллаа. Нийтийн тээврийн удирдлагууд тэдэн автобус орж ирнэ, оруулж ирсэн гэж яриад л өнөө өглөө их ажилтай, ажлын бүтээмжтэй байлаа” гэж ярих нь ажилдаа чин үнэнхүү хайртайг илтгэнэ.
Надтай ярилцахын хажуугаар “Та тийшээ суу, чи энд суудал байна” гэж зохицуулна. Их сайхан цэвэрхэн автобус байна билээ, шинэ болохоор аргагүй биз дээ.
Миний хажууд суусан 5 настай хүү ээжийнхээ хамтаар аав руугаа видео колл хийгээд л “Ааваа би давхар автобусанд явж байна та харж байна уу” гэж гайхуулж ярих нь өхөөрдөм.
25 дугаар эмийн сангийн автобусны буудал дээрээс нэг өвөө дээш зүтгэж “Хүү минь хотын соёлыг хоёр давхар дээрээс харах гэсэн юм аа, хамгийн урд сууж болох уу” гэж асууна. Нээрээ л нэг үеэ бодвол нийтийн тээвэрт шинэчлэл хийгдэж байгаа нь таатай…
Одоо замаа засчихвал болоо доо /бас картаар үйлчлүүлээд сурчихвал бүүр сүпэр/ гэж бодсоор Сүхбаатарын талбай дээр үсрээд л буусан даа би. Хүүгээ энэ автобусанд суулгаж үзүүлнэ дээ гэсэн бодолтойгоор зорчигчоо суулган хөдлөх ногоон автобусыг харсаар хоцорч билээ. Хотоо хөгжүүлж байгаа удирдлагуудад баярлалаа.
