УИХ дахь МАН-ын бүлгийн дарга Д.Тогтохсүрэн төсвийн тодотголын талаар дараах тайлбарыг өгсөн байна. Тэрээр “Төсөвт тодотгол хийх төслийг Засгийн газар боловсруулж дуусаад, өчигдрийн хуралдаанаар хэлэлцсэн. 2020 оны төсвийг анх батлахдаа төсвийн алдагдлыг ДНБ-ий 5.1 хувь буюу 2.1 орчим их наяд төгрөгийн алдагдалтай байна гэж баталсан.
Одоо бол Сангийн сайдын мэдээлж байгаагаар жилийн эцэс гэхэд төсвийн орлого дөрвөн их наяд гаруй алдагдал гарах юм байна. Тэгэхээр ДНБ-ий 12 орчим хувь руу очих нь гэдэг зүйл хэлж байгаа. Ковид-19-тэй холбоотойгоор манай уул уурхайн үйлдвэрлэл, гадагшаа гаргадаг байгалийн баялаг өмнөх жилийн мөн үеийнхтэй харьцуулахад 62 орчим хувиар буурсан байна.
Манай улс 2020 онд 45 сая тонн нүүрс гаргана гэж төлөвлөсөн. Гэтэл одоо дөнгөж 11 сая тонн нүүрс гаргасан байна. Тиймээс орлого маш ихээр буурсан. Үүнтэй холбоотойгоор төсөвт маш их хүндрэл үүсч байгаа. Хүндрэлүүдээс гарах олон арга хэмжээ авахаар төсвийн тодотголд орж ирж байгаа юм билээ. Тухайлбал нэгд, хөрөнгө оруулалтаа хасч байгаа.
Тодруулбал, 500 гаруй тэрбум төгрөгийн хөрөнгө оруулалтыг хасна. 2020 онд 1.8 их наяд төгрөгийн хөрөнгө оруулалт хийхээр төсөвт тусгасан. Үүнийхээ 500 тэрбумыг хасна гэсэн үг. Гэрээ хийгдээгүй, тендер нь зарлагдаагүй хөрөнгө оруулалтыг хасъя гэж байгаа нь зөв. Хоёрт, уул уурхайн бүтээгдэхүүний экспортоо нэмэгдүүлэхээр төлөвлөсөн байна лээ. Ингэхээс өөр арга байхгүй. Гуравт, төсвийн тэвчиж болох зардлыг хасах, шаардлагатай бол бүтцийн өөрчлөлт хийх шаардлага үүснэ.
Ер нь бид энэ хүнд үед төсвийн зарлага дээр анхаарч, зарлагын шинэчлэл хийх тал руугаа ажиллана. Зарлагаа багасгаж байж л төсөв сайжирна. Тиймээс Засгийн газар энэ чиглэлээр төсвийн төслөө боловсруулсан байна лээ. Өчигдөр Засгийн газрын хуралдаанаар хэлэлцсэн бол өнөөдөр бүлгийн хурлаар хэлэлцээд ирэх долоо хоногоос Их хурал хэлэлцээд явна гэсэн төлөвлөгөөтэй байна” гэж мэдэгджээ.
