Эрүүл мэндийн сайд Т.Мөнхсайханы мэдээллийг хүргэж байна. Тэрээр “УИХ-ын ээлжит бус чуулганаар төсвийн тодотголд Эрүүл мэндийн байгууллагуудын тогтолцоонд өөрчлөлт оруулах, Эрүүл мэндийн тухай хууль, Эрүүл мэндийн даатгалын тухай хууль, Эмнэлгийн тусламжийн тухай хуулиудад шаардлагатай өөрчлөлтүүдийг оруулсан. Ингэснээр цаашдаа эрүүл мэндийн салбарт оновчтой санхүүжилт хийх, эрүүл мэндийн байгууллагуудын ажилтнууд гүйцэтгэлийнхээ хэмжээгээр цалин урамшуулал авдаг болох, эмнэлгийн үйлчилгээ сайжрах зэрэг томоохон өөрчлөлтүүд гарна.
2020 оны 11-р сарын нэгнээс хөнгөлөлттэй эм олгох тухай хуулийн өөрчлөлтүүдийг оруулсан. Өөрөөр хэлбэл бүх эмийн сангуудаар хөнгөлөлттэй эм олгох боломжийг бүрдүүллээ. Ард иргэдэд чирэгдэл багатай байхаар зохицуулалт хийнэ. Бусад хуулийн өөрчлөлтүүд ирэх оны нэгдүгээр сарын нэгнээс хэрэгжиж эхэлнэ. Ингэснээс эрүүл мэндийн үйлчилгээний санхүүжилт, тусламж үйлчилгээний хүртээмж сайжирна” гэлээ. Энэ үеэр сэтгүүлчдийн асуултад дараах хариултыг өглөө.
Нэгдүгээр эмнэлэг хагас бие даасан байдалд шилжсэн. Ямар өөрчлөлт гарсан бэ?
-Эмнэлгүүдийг хагас бие даасан байдалд шилжүүлнэ гэдгийг зарим иргэн буруу ойлгоод байх шиг байна. Энэ нь хувьчлалын асуудал огт биш. Эмнэлгүүд биеэ даасан ТУЗ-тэй болно. Эндээс улс төрөөс ангид тодорхой шийдлүүдийг гаргадаг, төлөөлөн удирдах зөвлөлөө өөрсдөө сонгодог болох тухай юм. Энэ онд буюу дөрөвдүгээр сарын нэгнээс УНТЭ, УГТЭ, Арьсны өвчин судлалын үндэсний төв зэрэг эмнэлгүүд хагас бие даасан байдалд шилжсэн.
Улсын нэгдүгээр төв эмнэлэг хагас бие даасан байдалд шилжсэнээр хэд хэдэн өөрчлөлт гарсан. Үүний нэг илрэл эмнэлгийн ажилтнуудын цалинг үе шаттайгаар нэмэгдүүлж эхэлсэн. Тухайлбал, хандлагын 10 хувь нэмэгдэж байна. Цаашдаа үүнийг 30 хувь болгох, 2-3 жилийн дараа цалинг 2-3 дахин нэмэхийг төлөвлөж байна. Ирэх онд аймаг дүүргийн хэд хэдэн эмнэлгүүд хагас бие даасан байдалд шилжинэ.
-Байнгын хорооны хуралдааны үеэр резидент эмч нарын цалингийн асуудлыг хөндсөн. Энэ талаар?
-Эмнэлгийн тусламжийн тухай шинэ хуулиараа ирэх оны нэгдүгээр сарын нэгнээс тэд цалинтай болох ёстой. 2021 оны төсөвт тусгасан. Резидент эмч нар цалинтай болсноор хариуцлага үүрэг хүлээх хариуцлагатай тогтолцоо руу орж буй юм. Мэргэшсэн эмч нарын тоо нэмэгдсэнээр аймаг, сумдад хүрч үйлчлэх боломж бүрдэж байна.
-Цар тахлын үед ажиллаж буй эмч ажилчдад урамшуулалт цалин олгох тухай яригдсан. Төсвийн тодотголд оруулсан уу?
-Оруулсан. Корона вирусийн халдвар авсан өвчтөнүүдтэй тулд ажиллаж буй эмнэлгийн ажилтнуудын ар гэрт дэмжлэг болгож 5 сая төгрөгийг олгох, тусгаарлах байруудад болон бусад тохиолдолд ажиллаж буй ажилтнуудад сая төгрөгийн урамшуулал олгохоор төсвийн тодотголд суулгасан. Хууль батлагдвал шууд олгож эхэлнэ.
