Ерөнхий сайд Н.Учрал өчигдөр (2026.04.13) Баянгол дүүргийн эрүүл мэндийн төвд ажиллав. Тэрээр Эрүүл мэндийн сайд Э.Батшугарт эмч, ажилтнуудын цалингийн нэмэгдэл болоод хөнгөлөлттэй эмийн жагсаалтыг шинэчлэхийг үүрэг болгов.
Ерөнхий сайд Н.Учрал: Эмийн худалдан авалт, орж ирж байгаа эмүүдийн хяналтыг сайжруул. Эмийн жагсаалтаа шинэчил гэж би олон жил л хэлсэн. Та нар бүгд ард түмэн ямар эм хэрэглэдгийг мэддэг байлгүй дээ. Бараг огт уудаггүй эмүүдийг авчхаад л эмийн сангуудаар шахаад байх юм. Хэдхэн л эм хэрэглэж байгаа шүү дээ. Одоо бүгдээрээ эмийн нөөц бүрдүүлэх тал дээр анхаарахгүй бол олон улсын эдийн засгийн хямралтай энэ үед хавар эмийн нөөцлөлтийн талаар л яригдана шүү.
Тэгэхээр яг ханган нийлүүлж буй байгууллагатай нь гэрээ хийх, эм хямдруулах, ард иргэдийн өдөр тутам хэрэглэдэг эмүүдийг жагсаалтыг Батшугар сайд хэнтэй ч уулзахгүйгээр хар. Хүмүүстэй их уулзах юм бол эмийн жагсаалт чинь их хэцүү юм шиг байна лээ.
Хэзээ ч хэрэглэдэггүй эмийг аваачаад жагсаалтад бичээд даатгалаас санхүүжүүлэхийн цаана юу байна гэж ойлгох вэ? Нэг юм байна аа гэж бодно биз. Юм байдаг ч байх л даа. Би эмийн түр хороог байгуулж байх үед нэлээн л юм болдог юм билээ. Тэгэхээр эмийн жагсаалтаа шинэчил. Ард түмний хамгийн их хэрэглэдэг эмийг хөнгөлөлттэй эмийн жагсаалтад оруулаад санхүүжилтийг нь нэмээд өг. Тэгж байж ард иргэд сэтгэл хангалуун байна” гэв.
