Адекола Олавасен Азеез нарын Нигер Улсын гурван иргэн болон Монгол Улсын иргэн У.Ариунзул нар нь бүлэглэн, сэтгэцэд нөлөөт, мансууруулах бодис хууль бусаар хил нэвтрүүлж, хадгалсан, тээвэрлэсэн, худалдсан гэм хэргийг үйлдсэн хэмээн буруутгаж, тэдэнд 3-6 жилийн хорих ялыг Чингэлтэй дүүргийн шүүх өнгөрсөн жилийн 12 дугаар сард анхан шатны шүүхээс оноож байсан.
Гэвч уг хэргийг Нийслэлийн эрүүгийн хэргийн давж заалдах шатны шүүх 2020 оны гуравдугаар сарын 05-ны өдөр хянан хэлэлцээд анхан шатны шүүхийн шийтгэх тогтоолыг хүчингүй болгож, хэргийг Нийслэлийн прокурорт буцаасан хачирхалтай шийдвэрийг гаргасан байдаг. Түүгээр ч зогсохгүй Нийслэлийн давж заалдах шатны шүүхийн шийдвэр гарсны дагуу Нигер Улсын иргэд болон Монгол Улсын иргэн У.Ариунзул нар батлан даалтаар тухайн сард суллагдсан байдаг юм.
Их хэмжээний мансууруулах бодис, сэтгэцэд нөлөөт эмийг тээвэрлэж, хадгалж яваад баригдсан хүмүүсийг сулласан Нийслэлийн давж заалдах шатны шүүхийн шийдвэрийг прокурор эсэргүүцэж, Улсын Дээд шүүхэд 2020 оны зургадугаар сарын 12-ны өдөр эсэргүүцэл бичсэн боловч яагаад ч юм эсэргүүцлээ татсан байдаг.
Нийслэлийн давж заалдах шатны шүүхийн шийдвэрээр, батлан даалтад гарч суллагдсан Нигерийн иргэд ухаажсангүй. Тэд сая биедээ 282 грамм хар тамхи тээвэрлэж яваад дахин баривчлагдсан болохыг баттай эх сурвалж хэллээ. Уг хар тамхины зах зээлийн үнэ 850,000,000 төгрөгтэй дүйнэ гэдгийг албаны эх сурвалж хэлж байна.
Монголын шүүх байгууллага хар тамхи худалдан борлуулдаг гадаадын иргэдийг ял шийтгэлгүй үлдээж, монголынхоо хүүхэд багачуудыг хорлохоо хэзээ зогсоох вэ гэдгийг иргэд хурцаар асууж байна.
