Нийслэлийн Засаг даргын зөвлөлийн хуралдаанаар замын хөдөлгөөний түгжрэл ачааллын нөхцөл байдал, түүнийг бууруулах талаар авах зарим арга хэмжээний талаар хэлэлцэж байна. Энэ үеэр Цагдаагийн хурандаа Ж.Амгалан тэгш, сондгойгоор нь явуулах асуудлыг шийдвэр гаргах түвшинд авч хэлэлцүүлэхээр албан ёсны санал гаргалаа.
Тэрбээр “Олон төрлийн судалгаа, санал яриад түгжрэл арилахгүй. Судалгааг цаашид хэрэгжүүлэх, ашиглахаас цаг үеийн асуудлыг, энэ намрыг яаж туулах вэ гэдэг нь чухал байна. Цагдаагийн байгууллагаас эцсийн дүндээ Улаанбаатар хотын иргэдээсээ тэгш, сондгойгоор явуулах эсэхийг асууя гэсэн саналыг гаргаж байна.
Ард түмэн юу гэж бодож байгааг мэдэх хэрэгтэй.
Бусад орны жишгээр албадлагын арга хэмжээг авч болох боловч эхлээд иргэдээсээ асуух хэрэгтэй гэж үзэж байна. Эсвэл дэс дараалсан ажлуудаа аажмаар хийгээд явах боломжтой. Тэгсэн ч түгжрэл арилахгүй. Иргэд хайран алтан цагаа замын түгжрэлд үрсээр л байна” гэж ярилаа.
Энэ саналыг зөвлөлийн хуралдаанаас замын түгжрэлийг богино хугацаанд бууруулахад үр дүнтэй арга гэж үзэв. Санал дэмжигдвэл ажлын таван хоногтоо нийт автомашинаа тэгш, сондгойгоор нь үндсэн хоёр хувааж явуулах юм.
