Монгол Улсын өрсөлдөх чадвар 140 орноос 104 дүгээр байрт эрэмбэлэгдлээ

$\"\"$

Дэлхийн өрсөлдөх чадварын 2016-2017 оны тайлан дахь Монгол Улсын зэрэглэлийг танилцуулж байна

Дэлхийн эдийн засгийн
форум (ДЭЗФ) жил бүр эрхлэн гаргадаг Дэлхийн өрсөлдөх чадварын тайлангийнхаа дүнг 9 дүгээр сард
дэлхий даяар танилцуулав. Өрсөлдөх чадварын
индекс нь тухайн улсын хүрч чадах хөгжлийн түвшинг тодорхойлдог эдийн засгийн бүтээмжид нөлөөлөгч хүчин зүйлүүдийн үнэлгээнд
үндэслэдэг юм. Олон улсад хүлээн
зөвшөөрөгдсөн тус тайлангийн
дүнг улс орнууд анхааралтай авч үзэж бодлого, үйл ажиллагаандаа тусгаж хэрэгжүүлдэг
ажээ. Монгол Улс 2005 оноос энэхүү тайланд нэгдэж, өрсөлдөх чадварын түвшингээ дэлхийн 140 гаруй
оронтой харьцуулах боломжтой болсон юм.

Нээлттэй нийгэм Форум нь ДЭЗФ-ын түншээр 12 дахь жилдээ ажиллаж Өрсөлдөх чадварын тайлан дахь Монгол Улсын дүнг олон
нийтэд өргөн хүрээнд танилцуулж ажилласнаар манай улсын төр
засгийн зүгээс уг судалгааны дүнд анхаарал хандуулж, түүнийг бодлого шийдвэртээ ашиглаж байна. Тухайлбал, УИХ-ын 2016 оны 19 дүгээр тогтоолоор батлагдсан
\”Монгол Улсын тогтвортой хөгжлийн үзэл баримтлал – 2030” бодлогын баримт бичгийн биелэлтийг хэмжих шалгуур
үзүүлэлтүүдийн тоонд өрсөлдөх чадварын үзүүлэлт орсон нь судалгааны ач холбогдлыг улам нэмэгдүүлэв. Өнгөрсөн оны тайлангаар манай улс авбал зохих 7 онооноос 3,8 авч,
судалгаанд хамрагдсан 140 орноос 104-рт
эрэмбэлэгдсэн юм. Тогтвортой хөгжлийн үзэл баримтлалд өрсөлдөх
чадварын үзүүлэлтээр Монгол Улсын өнөөгийн түвшинг урагшлуулж,
дэлхийд өрсөлдөх чадвар сайтай эхний 70 орны нэг болох зорилт дэвшүүлжээ.

Өрсөлдөх чадварын 2016-2017 оны тайлангаас харахад Монгол
Улсын өрсөлдөх чадварт ахиц гарсангүй. Манай улс 3.8 оноо авсанаар
судалгаанд хамрагдсан 138 орноос 102 дугаарт эрэмбэлэгдэж байгаа юм. Судалгаанд хамрагдаж эхэлснээс
хойших 12 жилийн хугацаанд манай улс 3.2-3.9 оноо авсан нь өрсөлдөх чадварын
хувьд дорвитой өөрчлөлт гарахгүй байгааг харуулж байна.

Эх сурвалж: Дэлхийн эдийн засгийн форумын Дэлхийн өрсөлдөх
чадварын тайлангууд дээр үндэслэн нэгтгэв.

Өрсөлдөх чадварыг тодорхойлогч 12 тулгуур үзүүлэлтээс
Монгол Улс 4 үзүүлэлтээр бага зэрэг
ахиц гаргажээ (Зураг 2). Өмнөх онтой харьцуулахад макро эдийн засгийн орчны үзүүлэлт 0,4%-иар
өссөн бол санхүүгийн зах зээлийн хөгжил, технологийн бэлэн байдал, дээд боловсрол
ба мэргэжлийн сургалт гэсэн үзүүлэлтүүд тус бүр 0,1 оноогоор өсөв. Технологийн бэлэн байдлын үзүүлэлтийн түвшний өсөлтөд
үүрэн холбооны интернэт хэрэглэгчдийн тоо,
интернэтийн хурд өссөн нь нааштай нөлөө үзүүлжээ.

Эх сурвалж: Дэлхийн эдийн засгийн форумын Дэлхийн өрсөлдөх
чадварын тайлангууд үндэслэн
нэгтгэв.

Макро эдийн засгийн орчны түвшин өсөхөд инфляци буурч 5,9%
(110-р байр) болсон нь голчлон
нөлөөлжээ (Зураг 3). ДНБ-д харьцуулсан улсын төсвийн тэнцэл -8,3% (125-р байр), Засгийн газрын өр 76,5% (110-р байр) байгаа бол үндэсний нийт хуримтлал 21,7% (59-р байр) байна. Ерөнхийд нь авч үзвэл, манай улсын макро эдийн засгийн
орчны үзүүлэлт 2013 оноос
эхлэн бууралттай байгаа юм.

$\"\"$