Киргизстан дахь парламентын сонгуулийг хүчингүй болгохыг шаардсан эсэргүүцэгчид нийслэл Бишкек хотод парламентын танхимд дайран орж иржээ.
Бичлэгт Ерөнхийлөгч Сооронбай Жээнбековын ажлын өрөөнд хүмүүс цонхоор цаас шидэж байгааг харуулсан байна. Барилгын зарим хэсэг шатаж байсан бололтой.
Санал хураалтын дараа 16 намаас дөнгөж дөрвөн нам парламентад орох долоон хувийн босгыг давсан ба үүнээс гурав нь Ерөнхийлөгч Жээнбековтой нягт холбоотой аж.
Даваа гарагт цагдаа нар Ала-Тоо талбайд олон мянган жагсагчдыг тараахын тулд дуут дохио ашиглаж, тэднийг гудамжуудаар даган явсан байна.
Нийгмийн сүлжээгээр цацагдсан видео бичлэгт сөрөг хүчний жагсагчид цогцолбор руу нэвтрэх боломжтой болж, зарим нь хашаа руу өгсөж, нөгөө хэсэг нь гол хаалгыг түлхэж онгойлгож байгааг харуулав.
Сүүлд нь барилгаас утаа гарах нь харагдаж байв.
Жагсагчид улс төрийн удирдагчидтай уулзах хүртлээ Ала-Тоо талбайд жагссаар байх болно гэж мэдэгдэв.
120 орчим хүн гэмтэж бэртсэний тэн хагас нь хууль сахиулагчид байжээ.
Хэд хэдэн хүний биеийн байдал хүнд байгаа ч нас барсан тохиолдол гараагүй гэж Эрүүл мэндийн яам мэдэгдэлдээ дурджээ.
Эсэргүүцэгчид мөн Киргизийн Ерөнхийлөгч асан Алмазбек Атамбаевыг авлигын гэмт хэрэгт холбогдох шүүх хурлыг хүлээж, Үндэсний аюулгүй байдлын газрын цагдан хорих төвд хоригдож байгаад суллагдсан талаар орон нутгийн AKIpress мэдээллийн агентлаг мэдээлэв.
Даваа гарагт сөрөг хүчний 12 нам санал хураалтын дүнг хүлээн зөвшөөрөхгүй гэдгээ мэдэгдэв.
Дараа нь Ерөнхийлөгч Жээнбековын ажлын алба түүнийг хурцадмал байдлыг намжаахын тулд мягмар гарагт сонгуульд өрсөлдсөн бүх 16 намын удирдагчидтай уулзана гэжээ.
Сөрөг хүчний нэр дэвшигчид мөн сонгуулийн үр дүнг цуцлахыг Сонгуулийн төв хороонд уриалав.
Нэг нэр дэвшигч Рыскелди Момбеков даваа гарагт 5000 гаруй жагсагчидтай уулзах үеэрээ “Ерөнхийлөгч шударга сонгуулийг хянана гэж амласан. Тэр хэлсэндээ хүрээгүй” гэж хэлжээ.
Ноён Момбековын нам “Ата Мекен” парламентад орно гэдэгтээ итгэлтэй байсан боловч эцэст нь босгыг алдсан найман намын нэг болжээ. Даваа гарагт болсон эсэргүүцлийн жагсаалд Ата Мекен намын удирдагч Жанар Акаев хөлөндөө гэмтэл авчээ.
Эсэргүүцэгчид мөн Ерөнхийлөгч Жээнбековыг огцрохыг уриалж байв.
Европын аюулгүй байдал, хамтын ажиллагааны байгууллага (ЕАБХАБ) -ын сонгуулийг ажиглах миссияны тэргүүн Томас Босеруп товч санал хураалтаар “ерөнхийдөө сайн зохион байгуулалттай” болсон ч гэсэн санал “худалдаж авсан” гэх асуудал ноцтой түгшүүр төрүүлж байна гэжээ.
Эх сурвалж: BBC
