Тогтвортой Хөгжлийн Зорилгуудад цар тахын үзүүлэх үр нөлөөний тухай НҮБ-ын Хөгжлийн Хөтөлбөрөөс эрхлэн гаргасан шинэхэн судалгааны дүнд дэлхий даяар нийт 207 сая хүн цар тахлаас үүдэн ядууралд өртөх эрсдэлтэй байна. Гэхдээ ТХЗ-уудад оруулах хөрөнгө оруулалтаа засаглал, нийгмийн хамгаалал, ногоон эдийн засаг болон дижиталчлал чиглэлд илүү нэмэгдүүлж чадвал 2030 он гэхэд хамгийн эмзэг болон үймээн самуун бүхий улсуудын 146 сая иргэнийг нэн ядуурлаас хамгаалж чадахаар байна.
Ковид-19 цар тахал дэлхий дахинд төдийгүй Монгол Улсад урьдчилан харж, таамаглашгүй олон сорилтуудыг бий болгосон. Үүнээс үүдэн хөгжлийн шийдлийн тухай уламжлалт болон анхдагч арга барилууд яаралтай шинэчлэгдэх шаардлагатай болж байна. Монгол Улс дахь НҮБ-ын Хөгжлийн Хөтөлбөр (НҮБХХ)-ийн зүгээс Зөвлөх хорооны хоёрдугаар уулзалтыг дотоодын болон олон улсын оюуны манлайлагчидтай цахимаар хийж Монгол Улс дахь цар тахлын үр нөлөөг системийн аргачлалаар дамжуулан хэрхэн яаж шийдвэрлэх боломжтой тухай өнөөдөр хэлэлцлээ.
Дэлхий дахинд төдийгүй Монгол Улсад цар тахлын учруулж буй нийгэм-эдийн засгийн сөрөг үр нөлөөнөөс үүдэн НҮБ-ын Хөгжлийн Хөтөлбөр 2020 оны эхэн үеэс шийдэл боловсруулагчаас шийдлийг хамтран хэрэгжүүлэгч болохоор илүү идэвхитэйгээр системийн аргачлалыг хөгжүүлэн ажиллаж байна. Цар тахлын сөрөг үр дагаврууд нь Монгол Улсын сайн сайхан, хэнийг ч орхихгүй ирээдүйг бий болгоход өнөөгийн системийн дутагдалтай, эмзэг байдлуудыг илчилсэн юм. Зөвлөх хороо нь өнөөдөр Монгол Улсын өмнө тулгараад буй сорилтуудыг өөр, илүү шинэлэг логик болон аргачлалаар шийдвэрлэхийн чухлыг агуулсан системийн хувьслын боломжит шийдлүүдийн тухай хэлэлцлээ.
НҮБ-ын Хөгжлийн Хөтөлбөр уур амьсгалын өөрчлөлт, Ковид-19 цар тахал, болон өсөн нэмэгдэж буй нийгмийн тэгш бус байдал зэрэг олон төрөл зүйл болон өргөн цар хүрээг хамарсан сорилтуудыг шийдвэрлэхэд илүү идэвхтэй, санаачилагатайгаар системийн хувьслыг ашиглан ажиллаж байна.
“Цар тахлын дараах ирээдүй одоог хүртэл тодорхой бус байна. Гэхдээ бидний зүгээс Монгол Улсад санал болгох гарц болон шийдлүүд нь ард иргэдийн нэр төртэй амьдрал, дахин тэнцвэржүүлсэн эдийн засаг болон монголчуудын болон байгаль орчны сорилтод тэсвэртэй байх чадварыг тэтгэхэд чиглэн ажиллана. Иргэн бүр үр өгөөжийг нь хүртэснээр Монгол Улс илүү сайхан ирээдүйн хөгжлийн замналдаа орж чадна. Монгол улсын хөгжлийн төлөөх хувьслын аянд ороход дэмжлэг үзүүлэхээр ажиллаж буй Зөвлөх хороонд гишүүд, итгэлт түншүүд та бүгдийн оролцоогүйгээр энэхүү зорилгуудад хүрэх боломжгүй. Өнөөдөр энд шинээр илэрч буй сонголтуудыг тодорхойлоход хувь нэмрээ оруулж буй оюуны манлайлагч та бүхэнд талархаж байна” хэмээн НҮБ-ын Хөгжлийн Хөтөлбөрийн Суурин Төлөөлөгч Илейн Конкиевич нээлтийн үгэндээ онцоллоо. Тогтвортой Хөгжлийн Зорилгуудад цар тахын үзүүлэх үр нөлөөний судалгааг энд дарж хүлээн авна уу.
НҮБ-ын Хөгжлийн Хөтөлбөр нь ядуурал, тэгш бус байдал болон уур амьсгалын өөрчлөлтөөс үүдэлтэй шударга бус байдлыг эцэслэх зорилго бүхий Нэгдсэн Үндэстний Байгууллагын тэргүүлэх агентлаг юм. Дэлхийн 170 орны түншлэгчид болон мэргэжилтнүүдийн өргөн цар хүрээт хамтын ажиллагааны дүнд эх дэлхий, хүн бүрийн төлөө хөгжлийн урт хугацааны, цогц шийдлийг бий болгоход улс үндэстнүүдийг дэмжин ажилладаг.
