Японы эрх баригчид нүүрстөрөгчийн давхар ислийн ялгарлыг бууруулах бодлогынхоо хүрээнд эрчим хүчний салбарт устөрөгчийн хэрэглээг эрс нэмэгдүүлж, 2030 он гэхэд жилд 10 сая тоннд хүргэхээр төлөвлөж байна.
“Nikkei” сонинд мэдээлж буйгаар, энэ хэмжээ нь 30 цөмийн реакторын хүчин чадалтай тэнцэх цахилгаан эрчим хүч үйлдвэрлэхэд хангалттай юм. 2017 онд Японы эрх баригчид жилд 300 мянган тонн устөрөгч ашиглах зорилт тавьж байжээ. Тус улс нар, салхины эрчим хүч гэх мэт сэргээгдэх эрчим хүчтэй харьцуулахад устөрөгчийг илүү найдвартай эрчим хүчний эх үүсвэр гэж үздэг байна.
Төлөвлөгөөгөө товлосон хугацаанд нь хэрэгжүүлэхийн тулд Японы Засгийн газар энэ салбарын төлөөлөгчдөд 2 их наяд иентэй (19.2 тэрбум ам.доллар) тэнцэх хэмжээний татаас олгож, татварын хэд хэдэн хөнгөлөлт үзүүлэхээр төлөвлөжээ. Гэсэн хэдий ч одоогоор устөрөгчийн эрчим хүч үйлдвэрлэх өртөг байгалийн шингэрүүлсэн хийтэй харьцуулахад 10 дахин их байна. Тиймээс энэ сегментийг хөгжүүлэх үйл явц удаан үргэлжилж байгаа аж.
Устөрөгчийг эрчим хүчний эх үүсвэр болгон ашиглахаас гадна, Японы эрх баригчид энэ төрлийн түлш хэрэглэдэг автомашин, тэр дундаа хотын автобусны үйлдвэрлэлийг үргэлжлүүлэн дэмжихээр төлөвлөсөн байна. Түүнчлэн далайн тээврийн салбарт устөрөгчийн түлшийг ашиглах технологийг нэвтрүүлэхээр төлөвлөжээ. Тухайлбал, “Kawasaki Heavy Industries” компани 2025 он гэхэд устөрөгчийн ачааны хөлөг онгоц үйлдвэрлэж эхлэх зорилт тавьжээ.
Ногоон эрчим хүчийг хөгжүүлэх замаар 2050 он гэхэд нүүрстөрөгчийн давхар ислийн ялгарлыг тэглэх зорилт тавьснаа Японы Ерөнхий сайд Сүга Ёшихидэ 10 дугаар сард мэдэгдсэн билээ.
