Төрийн өмч, ард түмэн, төрийн баялгийг үргүй зарцуулсан, өөртөө давуу байдал үүсгэсэн гээд хууль хүчний байгууллагап шалгуулж байгаа иргэн, ААН-үүдэд цаашдаа ямар хариуцлага тооцож, улсад учруулсан хохирлыг төлүүлэх үү гэдэг асуултад Ерөнхий сайд доорх хариултыг өглөө.
Ерөнхий сайд У.Хүрэлсүх: Засгийн газар сүүлийн жилүүдэд улс орныхоо алдагдсан өмч хөрөнгийг олж авч байгаа. Эрдэнэт үйлдвэр, Багануур, Бөр-Өндөр, Салхит, Асгат, Ноён-Уул, Тост тосон бумбын орд, Гутайн даваа гээд бүгд алдагдсан байсан. Энэ бүгдийг бид улсдаа эргүүлэн авч байгаа. Аж үйлдвэрийн газрууд, ашигт малтмалтай байгалийн баялгуудаа эргүүлэн авахын тулд нэлээдгүй ажил хийж байгааг та бүхэн харж байгаа.
Маш том тэмцэл хийж авч байна. Цаашдаа ч төрийн мэдэлд авах ёстой олон уул уурхайн орд газрууд бий. Өнгөрсөн дөрвөн жилийн хугацаанд алдагдсан өмч хөрөнгийг эргүүлэн авах ажлыг бид сайн хийсэн.
Би нэг л зүйл, нэл зарчмыг хэлнэ. Төрийг хохироосон хэнбэгуай ч төрийн өмнө хариуцлагаа хүлээх ёстой. Энэ дээр хэн нэгэн хүнийг хамгаалсан, хаацайлсан зүйл байж таарахгүй. Сонин хэвлэлээр янз бүрийн мэдээлэл гардаг. Улсыг хохироосон бол тэр хохирлоо төлөх ёстой. Хууль шүүхийн байгууллага шийдвэр гаргаад гэм буруутайг нь тогтоогоод хохирол учруулсан түүнийг нөхөн төлүүлэх шийдвэр гаргасан бол түүнийгээ зайлшгүй төлөх ёстой.
Энэ бол шударга ёсны зарчим.
Монгол Улсын Засгийн газар болон Засгийн газрын тэргүүн шүүх прокурортой харьцах эрх мэдэл байдаггүй ард иргэд, хэвлэлийнхэн ойлгох хэрэгтэй. Ерөнхий сайдад хариуцах хэдхэн байгууллага байдгийг мэдэж байгаа. Шүүх, прокурор бол бие даасан байгууллага. Тэнд хүний гэм буруутай эсэхийг тогтоодог. Тиймээс зарим нэг зүйл дээр улс төр хийсэн өнгө аястай мэдээ мэдээлэл гардаг юм байна лээ. Тийм зүйл байхгүй.
Төрийн хууль цааз хэрэгжих ёстой газраа хэрэгжиж, бид биелүүлэх ёстой. Монголын төрөөс хулгай хийсэн хэнбэгуай ч авснаа, алдсан зүйлийг буцааж төлөх ёстой. Энэ байр суурин дээр Ерөнхий сайд хатуу зогсоно. Сангийн сайдаар ахлуулсан ажлын хэсэг томоохон төсөл хөтөлбөрүүдийг шалгаж эхэлж байгаа.
Ард түмний баялгаас авсан мөнгө хаашаа орж байгааг шалгаж байгаа. Шилэн, ил тод байхыг анхааруулж байгаа” гэлээ.
