Гэртээ зочин урихгүй, айл хэсэхгүй, хоёр, гурваараа гадуур зугаалахгүй байх нь Ковид-19 халдвараас хамгаалах хамгийн үр дүнтэй арга

Дэлхийн 30 гаруй улсад дэгдээд буй коронавирусийн шинэ хувилбарын талаар ЭМЯ-ны ахлах шинжээч Д.Нарангэрэл өнөөдөр мэдээлэл өглөө.

Коронавирусийн шинэ хувилбар нь 20-оос доош насны залуучуудад халдварлах нь өндөр байна

Эх сурвалж: ЭМЯ

Тэрбээр “Дэлхий дахинд өнөөдрийн байдлаар коронавирусийн цар тахлын тархалт эрчтэй хэвээрээ байгаа бөгөөд 81,475,053 хүн халдвар авжээ.

Англи улсаас гаралтай коронавирусийн мутацид орсон шинэ хувилбар 30 гаруй улсад тархсан байна.

Лондонгийн Империал коллежийн эрдэмтдийн судалгаагаар коронавирусийн шинэ хувилбар нь 20-оос доош насны залуучуудад халдварлах нь өндөр байна. Халдварлалтын индекс нь Ковид-19-ийн вирусийг бодвол 1.4-1.8 дахин их байна. Энэ үзүүлэлт нь вирусийн шинэ хувилбар хүүхэд залуучуудад богино хугацаанд хурдан тархаж байгааг харуулж байна. Дэлхийн бусад орнуудад гуравхан сарын дотор тархах эрсдэл байгаа учраас коронавирустэй тэмцэх, сэргийлэх арга хэмжээ, бэлэн байдлыг хангаж ажиллахыг улс орнуудад анхааруулжээ.

Коронавирусийн шинэ хувилбарын халдвар дамжих зам нь Ковид-19-тэй адилхан

Эх сурвалж: ЭМЯ

Коронавирусийн шинэ хувилбар нь олон орныг хамарч байгаа ч Лондон хотын эрдэмтдийн судалгаагаар халдвар дамжих зам нь Ковид-19-тэй адилхан байна гэж үзжээ. Өөрөөр хэлбэлкоронавирусийн шинэ хувилбар нь агаар дуслын болон агаараар, ахуйн хавьтал гэсэн үндсэн гурван замаар дамжиж байгаа гэсэн үг.

Иймээс иргэд амны хаалтаа зөв зүүх, хүн хоорондын зай барих, хүний бөөгнөрөл үүсгэхгүй байх, гараа сайтар савандаж угаах нь мутацид орсон халдварын шинэ хувилбараас сэргийлэх үр дүнтэй арга болохыг тогтоожээ.

Шинэ хувилбарын тархалт хурдан байгаа учир вакцин хэрхэн нөлөөлөх талаар эрдэмтэд зайлшгүй судлах хэрэгтэй. Судалгааны дараа дэлхий нийтэд дархлаажуулах арга хэмжээг өргөн хүрээнд зохион байгуулах нь зүйтэй гэсэн зөвлөмжийг гаргасан байна.

Хүний бөөгнөрөл үүсгэхгүй байх нь чухал

Эх сурвалж: ЭМЯ

Коронавирусийн халдварын дэлхий дахины нөхцөл байдал болон нийслэл Улаанбаатар хотод коронавирусийн дэгдэлт гарч байгаа энэ үед иргэд баяр ёслолын үеэр гэртээ байх, гэртээ зочин урихгүй, хүний бөөгнөрөл үүсгэхгүй, айл хэсэхгүй, хоёр, гурваараа нийлж гадуур, дотуур зугаалахгүй байх нь халдвараас хамгаалах үр дүнтэй арга гэдгийг дэлхий дахины бодит жишээ харуулж байна” хэмээн зөвлөлөө.