“COVID-19”-ийн гурван шинэ хувилбар сүүлийн долоо хоногуудад илрээд байгаатай холбоотойгоор дэлхийн улс орнууд сонор сэрэмжээ улам дээшлүүлж байна.
Их Британид илэрсэн хувилбарыг 70 хувь илүү хурдан халдварладаг болохыг судлаачид тогтоогоод байгаа юм. Гэсэн хэдий ч шинэ хувилбарууд илүү хүндээр өвчлүүлдэг гэх нотолгоо одоогийн байдлаар байхгүй байна.
Их Британид коронавирусний шинэ хувилбар тархсаныг 12 дугаар сарын 14-нд анх мэдээлсэн бөгөөд “B117” вирусийг есдүгээр сарын дунд үеэс тархаж эхэлсэн гэж үзэж байгаа юм.
Өнгөрсөн долоо хоногт Өмнөд Африкаас өөр нэгэн шинэ хувилбар /501.V2/ илэрчээ. Өмнөд Африкт шинээр илэрч буй халдварын тохиолдлуудын дийлэнх нь уг хувилбараар халдварласан байна.
Мөн 12 дугаар сарын 24-нд Африкийн Өвчинд хяналт тавих төв Нигерид коронавирусний өөр шинэ хувилбар /P681H/ тархсан талаар мэдээлсэн юм. Уг хувилбарын хувьд илүү хурдан халдварладаггүй бололтой байгаа ажээ.
Өнөөдрийн байдлаар дэлхийн 31 оронд коронавирусний шинэ хувилбараар халдварласан тохиолдол илэрсэн байна.
Австрали
Австралийн эрх баригчид Их Британиас ирсэн хоёр хүнээс шинэ хувилбар илэрсэн талаар 12 дугаар сарын 21-нд мэдээлжээ.
Дани
Дэлхийн эрүүл мэндийн байгууллагын /ДЭМБ/ мэдээлснээр, Данид шинэ хувилбараар халдварласан есөн тохиолдол илэрчээ.
Канад
Их Британид илэрсэн шинэ хувилбараар халдварласан анхны хоёр тохиолдол Онтарио мужид бүртгэгдсэн талаар Канадын эрх баригчид 12 дугаар сарын 26-нд мэдээлжээ.
Франц
Францад шинэ хувилбараар халдварласан тохиолдол 12 дугаар сарын 25-нд бүртгэгджээ. Тодруулбал, Их Британийн нийслэл Лондон хотоос 12 дугаар сарын 19-нд ирсэн Францын иргэнээс халдвар илэрчээ. Түүнд халдварын шинж тэмдэг илрээгүй бөгөөд Тур хот дахь гэртээ өөрийгөө тусгаарлаж байжээ.
Итали
Италид Их Британиас ирсэн иргэнээс 12 дугаар сарын 20-нд шинэ хувилбар илэрсэн байна.
Япон
Японд илүү хурдан халдварладаг шинэ хувилбараар халдварласан эхний таван тохиолдол илэрснийг 12 дугаар сарын 25-нд мэдээлжээ. Халдвар Их Британиас ирсэн хүмүүсээс илэрчээ.
Йордан
Их Британид илэрсэн шинэ хувилбараар халдварласан эхний хоёр тохиолдол бүртгэгдсэнийг Йорданы Эрүүл мэндийн яам 12 дугаар сарын 27-нд мэдээлжээ. Халдвар илэрсэн хүмүүс Их Британиас саяхан ирсэн байжээ.
Ливан
Лондоноос ирсэн хүмүүсээс халдварын анхны тохиолдол илэрсэн талаар Ливаны Эрүүл мэндийн яам 12 дугаар сарын 25-нд мэдээлжээ.
Нидерланд
Амстердамын бүсээс Их Британид илэрсэн хувилбараар халдварласан хоёр тохиолдол илэрлээ гэж Нидерландын Эрүүл мэндийн сайд Уго де Йонге 12 дугаар сарын 22-нд мэдээлжээ.
Нигери
Нигерид коронавирусний шинэ хувилбар илэрсэн талаар Африкийн Өвчинд хяналт тавих төв 12 дугаар сарын 24-нд мэдээлжээ. Уг хувилбар Осун мужаас наймдугаар сарын 3, 10 дугаар сарын 9-нд цуглуулсан хоёр сорьцоос илэрсэн гэж “АР” агентлаг мэдээлсэн байна.
Сингапур
Их Британид илэрсэн коронавирусний хувилбараар халдварласан анхны тохиолдол Сингапурт 12 дугаар сарын 24-нд бүртгэгджээ. Сингапурт 11 дүгээр сарын 17-ноос 12 дугаар сарын 17-нд ирсэн 31 өвчтөний нэгийнх нь сорьцоос “В117” хувилбар илэрчээ.
Испани
Испанид шинэ хувилбараар халдварласан дөрвөн тохиолдол бүртгэгдсэн талаар 12 дугаар сарын 26-нд мэдээлжээ. Халдвар Их Британиас ирсэн хүмүүсээс илэрсэн байна.
Өмнөд Африк
Өмнөд Африкт шинэ хувилбар илэрсэн талаар өнгөрсөн долоо хоногт мэдээлсэн бөгөөд уг вирусийг Их Британид илэрснээс илүү хувьссан гэж үзэж байна. Мөн Өмнөд Африкт шинээр илэрч буй тохиолдлуудын дийлэнх нь “501.V2”-оор халдварласан байна.
БНСУ
Лондоноос 12 дугаар сарын 22-нд ирсэн гэр бүлээс шинэ хувилбар илэрсэн талаар БНСУ-ын Өвчинд хяналт тавих, урьдчилан сэргийлэх төв 12 дугаар сарын 28-нд мэдээлжээ. Тэдгээр гурван хүн шинжилгээнийхээ хариуг эерэг гарснаас хойш тусгаарлагдаж байна.
Швед
Их Британиас ирсэн зорчигчоос шинэ хувилбар илэрсэн талаар Шведийн Эрүүл мэндийн агентлаг 12 дугаар сарын 26-нд мэдээлжээ. Уг зорчигчийг Шведэд ирснийх нь дараа тусгаарласан бөгөөд одоогоор нэмж тохиолдол бүртгэгдээгүй байна.
Норвеги
Их Британиас 12 дугаар сарын эхээр ирсэн хоёр хүнээс шинэ хувилбар илэрлээ гэж Норвегийн эрх баригчид 12 дугаар сарын 28-нд мэдээлжээ.
Их Британи
Их Британид шинэ хувилбараар халдварласан 1000 гаруй тохиолдол илэрлээ гэж тус улсын Эрүүл мэндийн сайд Мэтт Хэнкок 12 дугаар сарын 14-нд мэдээлжээ. Тэдгээр тохиолдлын дийлэнх нь Английн өмнөд хэсэгт бүртгэгдсэн байна.
Мөн Өмнөд Африкт тархсан хувилбартай холбоотой хоёр тохиолдол бүртгэгдсэн талаар М.Хэнкок 12 дугаар 23-нд мэдээлжээ.
Энэтхэг
Их Британиас сүүлийн долоо хоногуудад ирсэн зургаан хүнээс шинэ хувилбар илэрлээ гэж Энэтхэгийн эрх баригчид 12 дугаар сарын 29-нд мэдээлжээ. Энэтхэгийн Эрүүл мэндийн яамны мэдээлснээр, зургаан өвчтөнийг болон тэдэнтэй ойр байсан хүмүүсийг тусгаарласан байна.
Пакистан
Их Британиас ирсэн гурван хүнээс халдвар илэрсэн талаар Пакистан 12 дугаар сарын 29-нд мэдээлжээ.
Чили
Их Британид тархсан хувилбараар халдварласан анхны тохиолдол илэрсэнтэй холбогдуулан гадааын орнуудаас ирсэн бүх хүнийг тусгаарлах дүрэм журмыг дахин тогтооход хүрлээ гэж Чилийн эрх баригчид 12 дугаар сарын 29-нд мэдээлжээ. Лондоноос 12 дугаар сарын 22-нд ирсэн Чилийн иргэнээс халдвар илэрчээ.
Швейцар
Их Британид илэрсэн хувилбараар халдварласан тав, Өмнөд Африкт тархсан хувилбараар халдварласан хоёр тохиолдол илэрснийг Швейцарын Эрүүл мэндийн яам 12 дугаар сарын 29-нд мэдээлжээ. Мөн цаашид халдварын тохиолдлын тоо нэмэгдэж болзошгүйг анхааруулжээ.
АНУ
АНУ-д Их Британид илэрсэн шинэ хувилбараар халдварласан анхны тохиолдол Колорадо муж улсад 12 дугаар сарын 30-нд бүртгэгджээ. Мөн түүнээс нэг өдрийн дараа өөр нэгэн тохиолдол Калифорнид илэрсэн байна.
