Монголбанкнаас сар тутам зохион байгуулдаг хэвлэлийн бага хурлаа зарлалаа. Банкны тухай хуульд нэмэлт өөрчлөлт оруулах тухай хуулийн төслийн эцсийн хэлэлцүүлгийг УИХ өчигдөр хийн баталлаа. Энэ хуулийг баталснаар банкны эздийн төвлөрөл буурч, өмчлөл, удирдлага, хяналтын тэнцвэртэй байдлыг бүрдүүлнэ. Мөн банкуудын удирдлагуудаас үүдэлтэй эрсдэл буурна. Хувьцааны эзэмшил, мэдээллийн хүртээмжэээр дамжуулан олон нийтийн хяналт сайжирна. Банкуудын засаглал сайжрахын сацуу хөрөнгийн зах зээлийн хөгжилд эерэгээр нөлөөлөх гэх мэт олон давуу талтайг хэвлэлийн хурлын эхэнд танилцуулав.
Монголбанкны Банкны бүтцийн өөрчлөлт, бодлогын газрын захирал н.Ариунбат дараах мэдээллийг өглөө.
Энэ хуулийн гол агуулгыг дөрвөн хэсэгт авч үзэж болно.
- Үйл ажиллагаа явуулж буй 12 банкийг нээлттэй ХК болгоно. Үүний 5 банк нь системийн нөлөө бүхий банкууд. Эдгээр таван банк 2022 оны зургадугаар сарын 30-ны өдөр гэхэд нээлттэй ХК болж, санхүүгийн зах зээлд хувьцаагаа арилжсан байх ёстой. Үлдсэн банкууд нээлттэй эсвэл хаалттай ХК хэлбэрээр үйл ажиллагаа явуулна.
- Аливаа этгээд дангаараа болон холбогдох этгээдийн хамт тухайн банкны 20-иос дээш хувийг эзэмшиж болохгүй. Энэ зохицуулалтыг банкууд 2023 оны арванхоёрдуаар сарын 31 гэхэд хангасан байх үүрэгтэй. Мөн нөлөө бүхий хувьцаа эзэмшигч нь Ерөнхийлөгч, УИХ-ын гишүүд, Засгийн газрын гишүүн байж болохгүй.
- Банкийг татан буулгавал тухайн банкны төлж барагдуулах төлбөрийн дарааллыг оновчтой байдлаар зохион зохион байгуулсан.
- Системийн нөлөө бүхий банкны тухай тодорхойлолтыг илүү нарийвчлан тусгасан. Энэ талаар Банкны салбарын тогтвортой байдлын тухай хуульд тусгайлан заасан байдаг. Одоогийн байдлаар нийт системийн 5-аас дээш хувийг эзэлж байгаа бол системийн нөлөө бүхий банк гэж үздэг. Цаашдаа тухайн банкны зах зээлд эзлэх хэмжээ, систем дэх гүйлгээний нийт дүн, банкны үндсэн үйл ажиллагаа, санхүүгийн систем дэх хамаарал, харилцагчийн тоо зэргийг харгалзана гэв.
