Дэлхий дахинд тун удахгүй капсултай эмийн хэмжээтэй жижиг залгидаг камераар гэдэсний хорт хавдрыг эрт үед нь илрүүлэх боломж бүрдэх нь. Ингэснээр ямар ч хүн гэртээ өөрийн биеэр хавдартай эсэхээ мэдэх боломжтой болох юм.
Учир нь Лондонгийн их сургуулийн коллежийн дурангийн мэс заслын мэргэжилтнүүд болон Шотланд дахь хэд хэдэн эрүүл мэндийн байгууллагад энэ камерыг хэрэглэж эхэлжээ. PillCam нэртэй 2см-ын хэмжээтэй энэхүү капсул нь видео камер болон дамжуулагчийн тусламжтай дотоод эрхтнүүдийн дүрсийг илгээдэг байна.
Өдгөө Английн 40 бүс нутагт 11 мянган хүнд уг туршилтыг эхлүүлээд байна. Уг капсул биемахбодид 5-8 цаг орших бөгөөд бие засах үед гадагшилдаг аж. Уг үйл явц хүний биед ямар ч хоргүй, бас өвтгөдөггүй гэнэ. Хорт хавдраас гадна ходоод гэдэсний замын үрэвсэлт өвчин болох Кроны өвчнийг илрүүлдэг байна.
Анагаах ухааны энэхүү шинэ аргачлалыг “капсулан дурангийн арга” гэж нэрлэжээ.
Энэхүү камер нь секундэд хоёр зураг авдаг байна. Эмч нарын хааны нийгэмлэгийн ерөнхийлөгч Эндрю Годдард “Анагаах ухаан гэрт ойртсоор байна. Технологи хөгжихийн хэрээр гэртээ хийх туршилтууд нэмэгдэх болно” гэжээ. Ковид-19-ийн цар тахал энэ хандлагыг хурдасгажээ.
Коронавирусийн цар тахлын улмаас эмнэлгийн үзлэг шинжилгээнд хамрагдах нь багассанаар хорт хавдрыг эрт үед нь илрүүлэх тохиолдол буурах эрсдэлтэй гэж Үндэсний эрүүл мндийг хамгаалах газрын захирал профессор Питер Жонсон хэлсэн байна.
Гэдэсний хорт хавдар Их Британийн нас баралтын хоёр дахь шалтгаан болж байна. Тус улсад жилд дунджаар энэ өвчнөөр 16600 хүн нас бардаг аж.
