Дани улсад “AstraZeneca” вакцин хийлгэсэн зарим хүнд тромбоэмболизм буюу цусны бүлэгнэл үүсэх шинж тэмдэг илэрч, нэг хүн нас барсан талаар мэдээлсэн.
Данийн Эрүүл мэндийн байгууллагууд “AstraZeneca” вакцин тариулсан иргэдтэй холбоотой дээрхи асуудлыг нарийвчлан шалгах ажлыг эхлүүлсэн бөгөөд урьдчилан сэргийлэх аюулгүй байдлын үүднээс уг вакцины тарилгыг 14 хоногийн хугацаанд иргэдэд хийхгүй байх шийдвэр гаргасан.
Мөн Данийн Эрүүл мэндийн яам вакцин тариулснаас шалтгаалж хүмүүст цусны бүлэгнэл үүссэн гэх нотлох баримт байхгүй байгааг цохон тэмдэглэсэн юм.
Тэгвэл АНУ-ын Үндэсний зүрх, уушги, цусны эмгэг судлалын институт болон Мичиганы их сургуулийн Франкэлын нэрэмжит Зүрх судасны төвийн эрдэмтэд өнгөрөгч арваннэгдүгээр сард “COVID-19”-ийн халдвараар хүнд хэлбэрээр өвчилсөн нийт өвчтөнүүдийн тал хувьд нь цусны бүлэгнэл үүсэж байгаа бөгөөд энэ нь тухайн хүнийг үхэлд хүргэх нэг шалтгаан болж байгаа талаарх судалгааг танилцуулж байв.
Судалгааны тайлантай бүрэн эхээр танилцах. /Судалгааны өгүүлэлтэй бүрэн эхээр танилцах/
Судалгааны өгүүлэлд дурдсанаар ихэвчлэн дархлааны эмгэг буюу аутоиммун өвчний антифосфолипидын синдромтой өвчтөнүүдэд цусны бүлэгнэл үүсэх тохиолдол ажиглагддаг байна. Харин “COVID-19”-ийн халдварын үед цусанд эргэлддэг аутоиммун эсрэг бие эсүүдэд дайралт хийж, хүний артери болон венийн судсанд тромбо буюу цусны бүлэгнэл үүсгэдэг бөгөөд энэ нь цус харвалт зэрэг амь насанд ноцтой аюул заналхийлэх шалтгаан болдог аж. Мөн “COVID-19”-ийн үед микроскопын судсанд цус бүлэгнэснээр өвчтөний уушгины цусны урсгалыг хязгаарлаж, хүний биеийн хүчилтөрөгчийн солилцоог алдагдуулдаг байна.
Аутоиммун эсрэг бие буюу аутоантибоди гэдэг нь хүний өөрийн эд, эрхтэн болон эс рүү андуурч хариу үйлдэл үзүүлдэг дархлааны уураг юм.
Судалгааг хамтран удирдсан Мичиганы их сургуулийн Франкэлын нэрэмжит Зүрх судасны төвийн доктор Йоген Канти энэ талаар “Бидний судалгаагаар “COVID-19”-өөр өвчилсөн хүний биед үүсэх цусны бүлэгнэл, түүнээс шалтгаалсан ноцтой эмгэгүүдийн шалтгаан нь аутоантибоди байж болзошгүйг тогтоосон” гэжээ. Мөн тэрээр цусны бүлэгнэлээс урьдчилан сэргийлэхийн тулд “Dipyridamole” буюу Дипиридамол эмийг хэрэглэх нь аюулгүй байх магадлалтай гэсэн юм. АНУ-ын Хүнс, эмийн хяналтын агентлаг харьцангуй хямд үнэтэй уг эмийг 20 гаруй жилийн өмнө цусны бүлэгнэл үүсэхээс урьдчилан сэргийлэх эмчилгээнд зөвшөөрсөн байдаг аж.
Харин Мичиганы их сургуулийн профессор Жейсон Найт “COVID-19″-ийн халдвараар хүнд өвчилсөн өвчтөнүүдийн тал хувьд нэг аутоантибодид эерэг хариу үзүүлсэн нь биднийг нэлээд гайхшруулсан. “COVID-19”-ийн халдвартай өвчтөнүүдэд бидний урд өмнө харж байгаагүй хүнд хэлбэрийн цусны бүлэгнэл үүсэж байна. Гэвч “COVID-19”-ийн халдвартай өвчтөний бие махбодод аутоантибодиг юу өдөөж байгааг бид хараахан тодорхойлж чадаагүй байна. Тиймээс цаашид нэмэлт судалгаа хийх шаардлагатай. Одоогоор бид тухайн хүн эдгэсний дараа цусанд нь аутоантибиодууд хэр удаан эргэлддэг болохыг судалж байна” гэсэн байна.
Тэгвэл судалгааг ахалсан Мичиганы их сургуулийн ревматологич, профессор Юу Зуо энэ талаар “Бид аутоантибодигийн түвшин өндөр “COVID-19”-ийн халдвартай хүмүүсийн амьсгалын үйл ажиллагаа илүү дордож байгааг ажигласан. Энэхүү эсрэгбие нь эрүүл эсэд хүртэл үрэвсэл үүсгэдэг” гэжээ.
Их Британийн Оксфордын их сургуулийн Нуффилдийн анхан шатны эрүүл мэндийн шинжлэх ухааны тэнхимийн профессор Энтони Харнден энэ талаар “AstraZeneca” вакцины аюулгүй байдалд эргэлзэх шалтгаан байхгүй. Хүмүүс үүнд огтхон ч санаа зовох шаардлагагүй. Учир нь өнөөдрийн байдлаар манай улс “AstraZeneca” вакцины 11 сая тун тарилга хийгээд байгаа бөгөөд зохицуулагч байгууллагууд аюулгүй байдлын тайланг цаг үргэлж хянадаг. “AstraZeneca” вакцин тариулсан хүмүүс дунд цус бүлэгнэх, өтгөрөх тохиолдолд нийт хүн амтай харьцуулахад илүү байгаа гэх тоо байхгүй. Угаасаа “COVID-19” өөрөө нэлээд хүнд хэлбэрийн цусны бүлэгнэл үүсгэдэг” гэсэн байна.
Харин Их Британийн Эм, эрүүл мэндийн бүтээгдэхүүний зохицуулах газрын Вакцины аюулгүй байдлын ахлах шинжээч, доктор Фил Брайан “Одоогийн байдлаар вакцин хийлгэсэн хүн ам дунд цусны бүлэгнэл үүссэн гэх мэдээлэл нийт хүн амын дундах бусад шалтгааны гаралтай цус бүлэгнэлийн тохиолдлын тооноос хэтрэхгүй байгаа” гэсэн юм.
Эрүүл мэндийн мэргэжилтнүүдийн хэлж байгаагаар хүний цус бүлэгнэж байх ёстой бөгөөд ингэж байж цус алдалтыг тогтоодог. Гэвч аутоиммун өвчний үед далд хэлбэрээр явагдсан цусны бүлэгнэл нь зүрхний шигдээс, цус харвалт зэрэг амь насанд аюултай бусад ноцтой шалтгаан үүсэх эрсдэл болдог. Хүний биед цус бүлэгнэл явагдсан үед үе мөч хавагнах, хөл бадайрч өвдөх, арьсан дээр хөхрөлт, улайлалт үүсэх, гүнзгий амьсгаа авахад цээжээр хөндүүрлэж өвдөх, шалтгаангүй амьсгал давчдах, ханиалгах зэрэг шинж тэмдэг илэрдэг байна. Энэ үед та яаралтай эмчид хандах шаардлагатай.
