Нийслэлийн захирагч Д.Сумъяабазар сэтгүүлчидтэй “Нийтийн тээвэр” сэдвээр уулзалт хийлээ.
Тэрээр энэ удаад замын түгжрэлийг шийдэж, нийтийн тээврийг сайжруулах арга замууд болон хотын бусад асуудлыг хөндөн ярилцсан юм.
Зарим асуудлыг сийрүүлвэл, “Тэнгэрийн тойрог” дүүжин тээвэр дээр санхүүгийн асуудал шийдэгдээгүй. Энэ төслийг хэрэгжүүллээ гээд замын түгжрэл шийдэгдэхгүй. Улаанбаатар хот бол урлагийн ансамбальтай, зүүн европын орнуудынх шиг байгаасай гэж мөрөөддөг. Хот гэдэг бол өөрийн гэсэн өнгө шийдэлтэй, ногоон байгууламжтай, хүний амьдрах орчинг хангасан, орчин үеийн шийдэлтэй байгаасай гэж хүсдэг хэмээн ярьлаа.
Мөн “Нийслэлийн нийтийн тээврийн парк шинэчлэлтийг хэрхэн хийх вэ” асуултад:
-Үндэсний үйлдвэрлэл нэртэй дампуу автобусыг авахгүй. Улаанбаатар хотын иргэдэд тохь тухтай, зардал өртөг багатай автобус авна. УБ хотын төсвөөс 110 тэрбум төгрөгийн татаасыг нийтийн тээвэрт өгдөг. Энэ тийм бага мөнгө биш. Цаашдаа цахилгаан болон газаар явдаг, дизель автобус хэдэн хувь байхын гэдэг хамаарлыг 30-40 хувьтай байхаар зохицуулна. Хоёр давхар автобус, дан автобус импортолно, дизель автобуснуудыг сайжруулна. Санхүүгийн эх үүсвэр үүнд хэрэгтэй. Зээл авна. Зээл бол зөв зарцуулж чадвал хамгийн ил тод санхүүгийн бүтэц. Хулгай хийхгүйгээр, авлига авахгүйгээр зарцуулах хэрэгтэй гэсэн юм.
Улаанбаатар хотын автозамын ачаалал маш их байгаа бөгөөд энэ хэвээр явбал 2030 он гэхэд хөдөлгөөний дундаж хурд 6 км/цаг болно гэдгийг судалжээ. Мөн бүртгэлтэй автомашины тоо 950 мянга руу дөхнө. Тиймээс яаралтай арга хэмжээ авахгүй бол нөхцөл байдал хүндэрч, 0 зогсолт хийнэ хэмээлээ.
