УИХ-ын гишүүн Н.Алтанхуяг Ерөнхийлөгч, Ерөнхий сайд, УИХ-ын дарга нар чуулганы нэгдсэн хуралдааны танхимд асуудал үүсгэн маргаж байгаа бөгөөд эрх барьж буй МАН сул ажиллаж байгааг шүүмжиллээ.
Өнөөдрийн чуулганы нэгдсэн хуралдаанаар УИХ-ын Төрийн байгуулалтын байнгын хорооны даргаар Ж.Мөнхбатыг сонгох асуудлыг хэлэлцсэн юм.
Энэ үеэр УИХ-ын гишүүн Н.Алтанхуяг “Та нарын хэнийгээ даргаа болгох чинь хамаагүй. Юу хийх вэ гэдэг чинь л чухал. Төрийн байгуулалтын бодлого нэг л биш болж байна. Монгол Улсын төрийн байгуулал эвдрэн сүйдэж байна. Төрийн гурван өндөрлөг, Үндэсний аюулгүй байдлын зөвлөл энэ танхимд орж ирээд олон улсын хэмжээнд хэрүүл зодооноо хийж байна. Ойрын үед болох сонгуулиудад албан бус нөхцөл үүсгэж, мөнгө тараах гэж байна. 62 хүнтэй том нам арай л их бярдах юм. 62 хүнтэй МАН аятайхан ажилламаар байна. Та нар нэлээн оодорч байх шиг байна. Сонгуулийн хууль мөнгөний хууль болсон. Өөрчлөх байх гэсэн өөрчлөгдсөнгүй. Монголын төрийг мөнгөөр босгох уралдаан тэмцээн хийж байна. Энэ тал дээр анхаарах хэрэгтэй” хэмээсэн юм.
