ЭМЯ–ны хэлтсийн дарга Г.Болдмаа сэтгүүлчдийн асуултад хариулав.
-Вакцин хийлгэснийхээ дараа халдвар авсан хүмүүст ямар эмчилгээ хийж байгаа вэ. Тухайн иргэд вакциныхаа дараагийн тунг хэзээ хийлгэх вэ?
-Вакцин хийлгэсэн ч халдвар авсан хүмүүс нь бүрэн дархлаа тогтоогүй байхад халдвар хамгааллын дэглэмээ сулруулсны улмаас халдвар авсан гэж үзэж байгаа. Тухайн иргэдэд коронавируст халдварын эсрэг зохих эмчилгээг ХӨСҮТ болон Цэргийн төв эмнэлэгт хийж буй.
Вакцины эхний тунг хийлгэснийхээ дараа халдвар авсан хүмүүст дараагийн тунг хийхгүй. Өөрөөр хэлбэл, тухайн иргэдийг эмчилж, эдгэрснээс нь хойш найман сарын дараа дахин дархлаажуулалтад хамруулна. Эхний тунг ямар вакцин хийлгэснээс шалтгаалж дараагийн тунг хийсний дараа бүрэн дархлаа тогтоно.
-Зарим вакцины хоёр дахь тунг хийх хугацааг хойшлуулсан шалтгааныг тайлбарлахгүй юу?
-АстраЗенека вакцины давтан тунг 4-6 дахь долоо хоногт хийх заавар бий. Гэхдээ сүүлийн үед хийсэн судалгаагаар давтан тунгийн хийх хугацааг уртасгасан. 12 долоо хоногийн дараа давтан тунг хийх нь үр дүнтэй гэж судалгааны дүн гарсан. Тиймээс Эрүүл мэндийн яамнаас коронавируст халдварын эсрэг АстраЗенека вакцины хоёр дахь тунг найман долоо хоног хүртэл хойшлуулж, дөрөвдүгээр сарын 23-наас эхлэн давтан тунг хийхээр болсон.
-Манай улс БНХАУ-ын Сенофарм үйлдвэрийн вакциныг яг хэзээ эмийн бүртгэлдээ бүртгэсэн бэ?
-Манай улсын хийж байгаа вакцинуудаас зөвхөн АстраЗенека вакциныг ДЭМБ бүртгэсэн бөгөөд энэ сардаа багтаж БНХАУ-ын Синофарм үйлдвэрийн вакциныг бүртгэх төлөвтэй байгааг хэлье.
ДЭМБ нь эрх зүйн зөвшөөрөл олгодог бус зөвлөдөг байгууллага. Харин манай улсын хувьд хуулийн дагуу Хүний эмийн зөвлөлөөр хэлэлцсэний үндсэн дээр Pfizer, AstraZeneka болон Синофармийн Веросел, Спутник V зэрэг дөрвөн төрлийн вакциныг бүртгэж авсан.
БНХАУ-ын Синофарм вакциныг 2021 оны хоёрдугаар сарын сүүлд бүртгэсэн бөгөөд хамгийн сүүлд ОХУ-ын Эйрфармд үйлдвэрлэсэн Монос группийн оруулж ирэх гэж буй АстраЗенека вакциныг бүртгэсэн байна.
