Д.Мөнх-Эрдэнэ тэргүүтэй АН-ын гишүүд С.Зориг агсны хөшөөний дэргэд мэдээлэл хийлээ.
АН-ын гишүүн Д.Мөнх-Эрдэнэ:
-Өлсгөлөн зарлаж байгаа хэсэг нөхдүүдийг ойлгохгүй байна. Юм л бол энэ сайхан хүний дэргэд ирж шоудаж, попордгоо болих хэрэгтэй. Өлсгөлөн зарлаад байгаа гишүүдийг хэний төлөө, юуны тулд вэ гэдгийг сайн ойлгохгүй байна. 1990 онд манай намын лидерүүд, ах нар, дээд үеийнхэн ардчилал, зах зээлийн нийгмийг авч ирэх гэж өлсгөлөн зарлаж байсан. Харин өнөөдөр хэсэг нөхөд албан тушаалын төлөө өлсгөлөн зарлаж байна. Нам руугаа нийлж МАН-ын эсрэг сонгуульдаа орохгүйгээр хоёр хувааж, намаа ялагдуулах гээд байгаа юм уу гэж би харж байна.
Намын буянд Н.Алтанхуяг дарга Ерөнхий сайдаар ажиллаж байсан. Намын буянд олон ч удаа сайд хийсэн. Намын буянд жагсаалтаар ч орж байлаа. Өөрийг нь дарга болгохгүй, нутгийнх нь дүүг дарга болгохгүй бол намаа эсэргүүцдэг байж болохгүй. 2020 оны сонгуулиар бие дааж Эрдэнэтээс гарч ирсэн. Одоо Монголын хамгийн их попордог хүнтэй нийлээд талбай дээр өлсөөд байгаад гайхаж байна. Сонгуульд бид нэгдэж, нягтарч цул болж орохоос биш салж ордоггүй юм. Мөрөөрөө яваа УИХ-ын гишүүдийг битгий уруу татаа гэж хэлмээр байна. Төрийн ордны дөрвөн давхраас Ерөнхийлөгч хэн өлсгөлөн зарлаж байна вэ гээд харж байж магадгүй. Цаг бүртгүүлэх ээ болио. Нэг хүний төлөө өлсгөлөн зарлахаа болиоч ээ гэж, намын гишүүд, журмын нөхдөдөө уриалъя. Зарим нэг нь эрүүл мэндийн шалтгаанаар өлсгөлөнгөө зогсоосон. Нэг нэгээрээ цувраад өлсгөлөнгөө зогсоо. Амь нас, эрүүл мэндээрээ хохирвол яах вэ. Та нарын эрүүл мэнд Н.Алтанхуяг, Х.Баттулга нарт хэрэггүй, үр хүүхдэд чинь хэрэгтэй. Н.Алтанхуяг даргаас албан тушаал авч байсан, цүнхийг нь барьж байсан нөхдүүд талбай дээр байна. Эд нар АН-ыг төлөөлөхгүй гэв.
