АНУ-ын Өвчний хяналт, урьдчилан сэргийлэх төвийн мэдээлснээр лхагва гаригийн байдлаар тус улсын 117 сая иргэн буюу нийт гуравны нэг нь “COVID-19”-ийн эсрэг вакцины хоёр тунд хамрагдсан байна. Улмаар цар тахалд хамгийн ихээр нэрвэгдсэн тус улсад өнөөдрийн байдлаар өдөрт илрэх халдварын шинэ тохиолдлын тоо өнгөрөгч нэгдүгээр сартай харьцуулахад тав дахин буурч, халдварын тархалт хумигдан, дархлаажуулалт тодорхой үр дүнд хүрээд байгаа юм.
Гэвч вакцины эсрэг үзэлтэй иргэд дархлаажуулалтад хамрагдалгүй үлдээд байгаагаас шалтгаалан АНУ-ын вакцинд хамрагдалт сүүлийн өдрүүдэд 30 хувиар буураад байгаа аж. Тиймээс тус улсын эрх баригчид болон хувийн компаниуд иргэдийн вакцинд хамрагдалтыг идэвхжүүлэх зорилгоор төрөл бүрийн урамшуулал, хөнгөлөлт санал болгож эхэлсэн.
Тухайлбал, хамгийн сүүлд Огайо мужийн захирагч Майк ДеВайн лхагва гарагт “COVID-19”-ийн эсрэг вакцинд хамрагдсан иргэдэд бейсболын тоглолт үзэх тасалбар, үнэгүй шар айраг болон нэг сая ам.долларын шагналын сан бүхий сугалаа санал болгосон байна.
Вакцины нэг болон хоёрдугаар тунд хамрагдсан иргэдийн дунд долоо хоног бүр сугалаа явагдах бөгөөд нийт таван иргэнийг азтанаар шалгаруулах аж. Сугалааны шагналын санг АНУ-ын Холбооны Засгийн газрын цар тахлын эсрэг тусламжийн сангаас санхүүжүүлэх юм.
Огайо мужийн захирагч Майк ДеВайн энэ талаар “Зарим хүн вакцин хийлгэсэн хүмүүс дунд сугалаа зарлах нь галзуу явдал гэж хэлэх байх. Магадгүй энэ нь мөнгө үрсэн явдал байж болох. Гэвч үнэн хэрэгтээ вакцины хангалттай нөөц байхад иргэдийг вакцинд хамруулж чадалгүй хүмүүсийн амь насыг алдана гэдэг бол жинхэнэ галзуурал” гэжээ.
АНУ-ын Нюь-Жерси болон Коннектикут мужууд шар айраг үйлдвэрлэгчид болон бар, пабуудтай гэрээ байгуулж вакцины нэгдүгээр тунд хамрагдсан иргэдийг үнэгүй шар айргаар урамшуулах ажлыг хийж байгаа юм. Харни Мериланд мужид вакцинд хамрагдсан төрийн албан хаагчдад 100 ам.долларын бэлэн мөнгөний урамшуулал олгож байна. Мөн өнгөрөгч долоо хоногт Нью-Йорк хотын захирагч Эндрю Куомо бейсболын “New York Yankees” болон “New York Mets” багийн удирдлагуудтай тохиролцож, вакцинд хамрагдсан иргэдийг үнэгүй тоглолт үзэх тасалбараар урамшуул болсон талаар мэдэгдсэн.
Түүнчлэн хувийн компаниуд вакцин тариулсан ажилчид болон үйлчлүүлэгчдийг урамшуулах төрөл бүрийн арга хэмжээг хэрэгжүүлж байгаа юм. Тухайлбал, түргэн хоолны “McDonald’s” сүлжээ вакцины хоёр тунд хамрагдсан ажилчиддаа 4 цагийн цалингийн хөлсийг урамшуулал болгон өгч байгаа бол 50 мянга гаруй ажилтантай супермаркетын сүлжээ “Kroger” компани вакцины хоёр тундаа хамрагдсан ажилчиддаа мөн 100 ам.долларын урамшуулал цалин олгож байгаа бөгөөд эрүүл мэнд болон шашин шүтлэгээсээ шалтгаалан вакцин хийлгэх боломжгүй ажилчиддаа эрүүл мэндийн сургалтад хамрагдсан тохиолдолд 100 ам.долларын урамшуулал цалин олгож байна.
