АНУ-ын Өвчний хяналт, урьдчилан сэргийлэх төв пүрэв гаригт “COVID-19”-ийн эсрэг вакцины хоёр тунд хамрагдсан иргэд олон нийтийн газраар амны хаалтгүй зорчиж болох журмыг танилцууллаа.
Өвчний хяналт, урьдчилан сэргийлэх төвийн захирал, доктор Рошель Валенский Цагаан ордны “COVID-19”-ийн талаарх хэвлэлийн хурлын үеэр “Иргэд вакцины хоёр тунд хамрагдсанаар цар тахлын улмаас хийж чадахгүй болсон зүйлсээ хийх боломжтой болно. Эргээд энгийн амьдралдаа орох энэ мөчийг бид бүхэн бүгд хүсэж байсан. Тэгвэл сэтгэл хөдөлгөсөн тэрхүү мөч ирлээ. Учир нь вакцины хоёр тундаа хамрагдсан иргэд олон нийтийн газраар амны хаалтгүй зорчих боломжтой боллоо” гэсэн юм.
Гэсэн ч нийтийн тээвэр, галт тэрэг болон онгоцоор зорчихдоо иргэд амны хаалтаа зайлшгүй зүүх журам үйлчилсэн хэвээр байх аж. Мөн иргэд вакцины хоёр тундаа хамрагдсан ч халдвараас урьдчилан сэргийлэх зорилгоор амны хаалтаа үргэлжлүүлэн зүүх нь ухаалаг алхам болохыг онцолсон байна.
Цагаан ордны эрүүл мэндийн ахлах зөвлөх, доктор Энтони Фаучи энэ талаар “Одоо амны хаалт зүүх эсэх нь хүмүүсийн хувийн сонголт юм. Хэдий вакцины хоёр тундаа хамрагдсан ч урьдчилан сэргийлэх зорилгоор амны хаалтаа үргэлжлүүлэн зүүхэд огт буруу зүйл биш” гэжээ.
АНУ-д өнөөдрийн байдлаар 117 сая гаруй иргэн буюу нийт хүн амын гуравны хоёр нь “COVID-19”-ийн эсрэг вакцины хоёр тунд хамрагджээ. Улмаар цар тахалд хамгийн ихээр нэрвэгдсэн тус улсад өнөөдрийн байдлаар өдөрт илрэх халдварын шинэ тохиолдлын тоо өнгөрөгч нэгдүгээр сартай харьцуулахад тав дахин буурсан байна.
