Дэлхий даяар коронавирусний 1.65 тэрбум гаруй тун вакцин тариад байна гэж “Our World in Data” цахим хуудас мэдээлжээ.
Тодруулбал, БНХАУ-д хамгийн олон буюу 497.27 сая тун вакцин тарьсан бол түүний араас 284 сая орчим тун вакцин хийсэн АНУ жагсаж байна.
Мөн Энэтхэгт 190.84 сая, Их Британид 59.8 сая, Бразилд 57.61 сая, Германд 44.4 сая, Францад 32.2 сая, Италид 30.49 сая, Туркт 27.84 сая тунг тус тус тарьжээ. Эдгээр орны араас ОХУ, Мексик Индонез бичигдэж байна.
Үүнээс гадна тарьсан вакцины тунг хүн амын тоотой харьцуулсан үзүүлэлтээр Сейшелийн арлууд тэргүүлж байгаа бөгөөд тус аралд 100 хүн тутамд 134.39 тун вакцин тарьжээ.
“Worldometer” цахим хуудасны мэдээллээр, “COVID-19” халдвар дэлхийн 220 гаруй улс орон, бүс нутагт бүртгэгдэж, 166.75 сая хүн халдвар авч, 3.45 сая гаруй хүн нас барсан байна.
