Сэргээшийн шинжилгээний сорьцыг өөрчилсөн байж болзошгүй гэх Э.Оюунболдын гаргасан гомдлын хэргийг гэмт хэргийн шинжгүй гэсэн үндэслэлээр хаасан.
Мөн Авлигатай тэмцэх газраас хааж шийдвэрлэсэн прокурорын шийдвэрийг хууль зүйн үндэслэлтэй гэж үзэн шийдвэрийг хэвээр үлдээжээ.
Тодруулбал,
1. Иргэн Э.Оюунболдоос 2019 оны 08 дугаар сарын 19-ний өдөр гаргасан “… Үндэсний их баяр наадмын үндэсний бөхийн төрөлд барилдан тав болон түүнээс дээш давж шөвгөрсөн 16 бөхөөс сэргээшийн шинжилгээний сорьц авах ажлын хэсгийн нэр бүхий албан тушаалтнууд нь шинжилгээний сорьцыг өөрчлөх, Дэлхийн допингийн эсрэг агентлагийн итгэмжлэгдсэн лабораторийн шинжилгээний хариуг хууль бусаар өөрчилж, олон нийтэд худал мэдээлэл тарааж, төөрөгдөлд оруулах замаар албан үүрэг, бүрэн эрх, албан тушаалын байдлаа урвуулан их хэмжээний хахууль авсан байж болзошгүй…” гэх гэмт хэргийн талаарх гомдлыг Авилгатай тэмцэх газрын мөрдөн шалгах хэлтэс хүлээн авч шалгаад, 2019 оны 08 дугаар сарын 23-ны өдөр Эрүүгийн хуулийн тусгай ангийн 22.4 дүгээр зүйлийн 2 дахь хэсэгт зааснаар хэрэг бүртгэлтийн хэрэг нээн, мөрдөн шалгах ажиллагаа явуулсан байна.
2. Мөрдөн шалгах ажиллагааны явцад хэрэгт цугларсан нотлох баримтуудаар Засгийн газрын хэрэгжүүлэгч агентлаг Биеийн тамир спортын газар, Монголын Үндэсний Олимпын хорооны хамтарсан тушаалаар байгуулагдсан Сэргээшийн шинжилгээ авах ажлын хэсэг болон Допингийн эсрэг үндэсний төвийн холбогдох албан тушаалтнууд нь сэргээшийн шинжилгээний дээж авч итгэмжлэгдсэн лабораторид хүргэх, ирсэн хариуг олон нийтэд мэдээлэхдээ холбогдох хууль тогтоомжийг зөрчсөн, мөн Дэлхийн допингийн эсрэг агентлагийн итгэмжлэгдсэн лабораторийн шинжилгээний хариуг хууль бусаар өөрчилсөн, олон нийтэд бодит бус мэдээлэл өгч, хахууль авсан гэх асуудал нь тус тус тогтоогдоогүй тул 2020 оны 10 дугаар сарын 13-ны өдөр “гэмт хэргийн шинжгүй” гэсэн үндэслэлээр хэрэг бүртгэлтийн хэргийг хааж шийдвэрлэжээ.
3. Авилгатай тэмцэх газраас дээрх хэргийг шалгах явцдаа БНСУ дахь Дэлхийн допингийн эсрэг агентлагийн итгэмжлэгдсэн лабораториос Үндэсний их баяр наадмын бөхийн төрөлд 2009-2019 онд шөвгөрсөн бөхчүүдээс авсан шинжилгээний дэлгэрэнгүй хариуг эрх зүйн туслалцаа үзүүлэх гэрээний хүрээнд гаргуулж авсан байна. Тус итгэмжлэгдсэн лабораторид хийгдсэн шинжилгээгээр 2009-2019 онд шөвгөрсөн бөхчүүдээс нийт 11 бөхийн сорьцод хориглосон жагсаалтад багтсан сэргээшийн төрлийн бодис илэрч, Дэлхийн допингийн эсрэг дүрэм, Үндэсний их баяр наадмын тухай хуульд заасны дагуу хариуцлага тооцсон байна.
Мөрдөн шалгах ажиллагааны явцад аливаа иргэн, хуулийн этгээдийг хохирогчоор тогтоогоогүй тул Монголын Үндэсний Бөхийн Холбоонд мэдэгдэх, прокурорын шийдвэрийг хүргүүлэх хууль зүйн боломжгүй болжээ.
Иргэн Э.Оюунболдын гаргасан гомдлын дагуу Авилгатай тэмцэх газраас мөрдөн шалгах ажиллагаа явуулсан хэргийг “гэмт хэргийн шинжгүй” үндэслэлээр хааж шийдвэрлэсэн прокурорын шийдвэрийг хууль зүйн үндэслэлтэй гэж үзэн хэвээр үлдээж шийдвэрлэсэн талаар Нийслэлийн прокурорын газрын ерөнхий прокурорын албан үүргийг түр орлон гүйцэтгэгч, хууль цаазын тэргүүн зөвлөх Д.Баянжаргал мэдээлсэн байна.
