Хуулийн төслийн танилцуулгыг Эрүүл мэндийн сайд С.Энхболд хийлээ. Хэлэлцэж буй асуудалтай холбогдуулан гишүүд асуулт асууж байна.
УИХ-ын гишүүн Н.Алтанхуяг:
Хилийн захиргаа байгуулъя гэдэг заалт оруулж ирж байгаа гэж ойлголоо. Одоо Замын-Үүдэд гацаад буй ачааны асуудлыг эхлээд шийдээрэй. Засгийн газрын нөөц хөрөнгө 40 тэрбум байсан. Тэр нь дуусчихсан түүнийг нэмэгдүүлэх эрхийг Засгийн газарт өгөөч гэдэг нь буруу. Мөн Эрүүл мэндийн даатгалын мөнгийг ковидын эсрэг зарцуулна гэдэг буруу. ПСР шаардлагагүй үед хэрэгтэй хэрэггүй хүний амийг ухаад 40-50 сая төгрөгийг гарын салаагаар гоожуулсан. Надад үнэндээ итгэл төрөхгүй байна.
Эрүүл мэндийн сайд С.Энхболд:
Бид ковидын үеийн эмчилгээний эмүүдийг Эрүүл мэндийн даатгалын санд багтаах хөнгөлөлтийг эдлэх боломжийг олгосон тушаалууд гараад явж байгаа. Ковидын үед шинэчлэгдсэн тарифын журмууд гарсан. Өмнө нь нэг хүний тариф 4 сая байсан бол шинэчлэгдсэн тарифаар 7.7 сая болсон. Үүнд бүх эмчилгээ эм нь багтсан байгаа. Гэрээр эмчлэгдэж байгаа хүмүүсийн тариф 70-аас 160 мянган болон нэмэгдсэн. Үүнд арбидол зэрэг эм багтсан.
УИХ-ын гишүүн Х.Булгантуяа:
Хэрэгжилтийг сунгахаас өмнө хуулийн хэрэгжилт ямар байсан бэ гэдгийг авч хэлэлцэх ёстой гэж бодож байна. Ковидын хуулиар маш олон эрх мэдлийг Засгийн газарт өгсөн. Иймээс энэ хуулийн хэрэгжилтийг чуулганы хуралдаанаар авч хэлэлцэх ёстой. Жирэмсэн болон хөхүүл эхчүүдийн асуудлаар Эрүүл мэндийн сайдаас асууяа. 2022 оны вакцины татан авалтын бэлтгэл хангагдаж байгаа юу. Вероселл вакцины үйлчлэл 6 сарын дараа дуусаж байна. Тэгэхээр гурав дахь тунгийн асуудал яригдана үүний бэлтгэл ажлыг хангаж байгаа юу.
Эрүүл мэндийн сайд С.Энхболд:
Жирэмсэн эхчүүдийн вакцинжуулалт эхэлсэн. Хүүхдүүдийн тухайд 12-15 насны хүүхдүүдийн вакцинжуулалтыг ирэх долоо хоногт эхлүүлэхээр төлөвлөж байна. Одоогийн байдлаар 866 хөхүүл эмэгтэй вакцинд хамрагдсан. Мөн 10 мянган орчим 16-17 насны хүүхэд мөн вакцинд хамрагдсан. Эдгээр хүмүүс бүгд Файзер вакцин хийлгэж байгаа.
