Засгийн газраас Үндэсний их баяр наадмыг үзэгчгүй, цахимаар явуулах шийдвэрийг гаргасан билээ. Үүнтэй холбоотойгоор зохион байгуулалтын асуудлаар Үндэсний их баяр наадмыг зохион байгуулах комиссоос мэдээлэл хийлээ. Мэдээллийн эхэнд Үндэсний их баяр наадам болон Ардын хувьсгалын 100 жилийн ойн нь тусдаа арга хэмжээ гэдгийг онцолсон юм.
Үндэсний их баяр наадмыг зохион байгуулах Үндэсний комиссын Ажлын хэсгийн дарга н.Баатархүү: Үндэсний их баяр наадмыг тогтоосон хугацаанд зохион байгуулдаг. Хугацааг нь хуульчилсан. Хүй долоо худагт үзэгчгүйгээр зохион байгуулах бэлтгэл ажилдаа орж байна.
Харин Ардын хувьсгалын 100 жилийн ой бол бүтэн жилийн хөтөлбөр юм. Энэ нь Үндэсний их баяр наадмаас тусдаа арга хэмжээ юм. Үндэсний их баяр наадмыг зохион байгуулах хороонд нийтдээ есөн салбар хороо ажиллаж байгаа. Наадмын төсөв өмнөх жилд 2.8-3 тэрбум төгрөг зарцуулдаг. Энэ жил энэ төсвөөс хэтрүүлэхгүй байхаар зохион байгуулалтыг хийнэ. Хүй долоо худагт цахим наадмыг зохион байгуулж, ард түмэнд шууд дамжуулан хүргэнэ.
Соёлын дэд сайд М.Батбаяр: Ардын хувьсгалын ойг тэмдэглэн өнгөрүүлэх төлөвлөгөө 2020 оны наймдугаар сард баталсан. Нийтдээ 45 арга хэмжээний төлөвлөгөөг баталж байсан. Үүний нийт зардал нь 10 тэрбум төгрөгөөр байхаар баталсан. Энэ нь Үндэсний их баяр наадамд хамаарахгүй гэдгийг зөв олгоорой. Нийгэмд яригдаад байгаа 10 тэрбум төгрөгийн зардал бол Ардын хувьсгалын 100 жилийн ойг бүтэн жилийн хугацаанд тэмдэглэх, зохион байгуулах 45 арга хэмжээний төлөвлөгөөний зардал юм. Саяхан Ардын хувьсгалын 100 жилийн ойг тэмдэглэхэд зарцуулах хөрөнгөөс хэмнэлт хийж, эрүүл мэндийн салбар болон ковидтой тэмцэхэд зарцуулах шийдвэрийг Засгийн газраас гаргасан. Одоо УИХ-аар төсвийн зарцуулалтыг шилжүүлэх асуудлыг хэлэлцэж шийдвэрлэнэ. Гэхдээ энэ нь Үндэсний их баяр наадам тэмдэглэхтэй огт холбоогүй, тусдаа арга хэмжээ гэдгийг зөв ойлгох хэрэгтэй.
Үндэсний их баяр наадмаар сур, бөх, морины уралдаан болж, эдгээрийг цахимаар ард түмэнд хүргэх Засгийн газрын шийдвэр хэвээрээ байгааг хэлмээр байна. Цахим наадам зохион байгуулах баг томилогдсон. Ерөнхий найруулагчаар Н.Наранбаатар, продюсерээр Г.Цоггэрэл, туслах найруулагчаар Б.Баатар нар найруулахаар бэлтгэлдээ орсон.
