Өчигдөр буюу долоодугаар сарын 7-ны өдөр нийслэл болон зарим аймгийн цахилгаан тасарсан. Үүний шалтгаан шалтгаан болон ажлын хэсгийн дүгнэлтийг Эрчим хүчний яамнаас танилцуулж байна.
ЭХЯ: Өчигдөр 15:28 цагийн орчим Гурвалжингийн гүүрний ойролцоо 29-р тулгуурт барилгын тугалган цаастай 13 м урттай материал тохогдсоноор баазын хооронд богино залгаа үүссэн. Улмаар төвийн бүсийн зарим хэрэглэгчийн цахилгаан хязгаарлагдсан. Энэ нь хамгаалалтын зурваст зөвшөөрөлгүй үйл ажиллагаа явуулж буй ААН, айл өрхтэй холбоотой асуудал юм. Тэдэнд удаа дараа шаардлага хүргүүлсэн.
Өчигдөр шөнө мэргэжлийн хүмүүсийн гаргасан урьдчилсан дүгнэлтийг танилцуулж байна. Цаашид нарийн мэдээллийг гаргана. Аль байгууллагуудад ямар хэмжээний хохирол гарсныг тодорхойлно. Цахилгаан тасарснаас ноцтой хохирол гараагүй, зөвхөн Хөвсгөл аймагт нэг оношлуур гэмтсэн мэдээлэл байна.
Диспетчерийн үндэсний төв:
Монгол Улсын эрчим хүчний салбар 2021-2022 оны өвлийн ачаалалд бэлдэж, тусгай засваруудыг хийж байна. Агаарын шугамд богино залгаа үүссэнээр чадлын дутагдалд орсон. Хэрэглээ, үйлдвэрлэлийн тэнцвэргүй, нөөц бэлтгэл чадалгүй байдлаас энэ хүндрэл үүссэн. Цаашид бид шинэ эх үүсвэр барьж, өөрсдийн цахилгаан, дулааныг бүрэн хангахаас гадна нөөц, бэлтгэлтэй байх хэрэгтэй.
-Өчигдрийн гэмтлийн улмаас хэдэн төгрөгийн зардал гарсан бэ?
-Шууд хохирол учирсан гэх мэдээлэл одоохондоо ирээгүй байна. ААН-үүд орлогоо алдсаныг нарийвчлан тодорхойлж байгаа.
-Эрчим хүч тасарсны дараах нөөцийн талаар мэдээлэл өгөөч?
-Эрчим хүчний нөөцийг бэлтгэх шаардлагатай. ДЦС-уудыг байгуулах, ашиглалтад оруулах нь чухал.
-Хүйтний улиралд ийм нөхцөл үүссэн бол яах байсан бэ?
-Өвлийн улиралд ийм асуудал гарвал байдал хүндэрнэ. Гэхдээ бид ийм асуудал гаргахгүйн тулд ажиллаж байна. Өчигдөр эмнэлгүүд нөөц эх үүсвэрээ ашиглан ажилласан. Бид зарим аймгуудтай холбогдоход ямар нэгэн ноцтой хохирол гараагүй хэмээн мэдээлсэн.
Хамгаалалтын зурвас зөрчсөнөөс, төрөл бүрийн хог хаягдлаа зүй зохисгүй хаяснаас эдгээр асуудал гарч байна. Хамгаалалтын зурвасыг чөлөөлөх үүрэг нь аймаг, нийслэлийн засаг дарга нарт байдаг. Энэ талаар холбогдох ажлуудыг хийж байна.
