Америкийн Луизиана мужийн эрэг орчим Ида хар шуурганд өртөж, хоёр сая хүн цахилгаангүй үлдэж, байшин барилга нуран, оршин суугчид асар их хохирол амсжээ. Одоогоор нэг хүн амиа алдсан нь тогтоогдсон ч мужийн захирагч энэ тоо өсөх магадлалтай байгааг хэлсэн байна. Хохирогч эрэгтэй мужийн нийслэл Батон Руж хотод амьдардаг байсан бөгөөд байшин дээр нь мод унасны улмаас амиа алджээ.
АНУ-ын Үндэсний хар шуурга ажиглах төвөөс мэдээлснээр салхи цагт 240 км-ын хурдтай болсон ба Саффир Симпсоны хар салхины таван хэмжигдэхүүний дөрөв дэх ангилалд оруулжээ. Даваа гарагийн өглөө гэхэд Ида хар шуурга нэгдүгээр ангилалд ортлоо суларсан байна. Мужийн захирагчийн мэдээлснээр цахилгаангүй болсноор усны шахуурга ажиллахаа больж цэвэр ус хомстож эхэлсэн байна.
Хохирол амссан оршин суугдчдад мужийн Үндэсний гвардийн бүхий л хүч, тэр дундаа 34 нисдэг тэрэг, онгоц, 200 машин дайчилж тусламж үзүүлж эхэлжээ.
2005 онд 1800 хүний амь насыг авч одсон Катрина хар шуурганы дараа бий болгосон үер усны аюулаас хамгаалах шинэ системийн бат бөх байдлыг Ида хар шуурга шалгалаа гэж орон нутгийн эрх баригчид хэлсэн байна. Асар их хөрөнгө зарцуулж хийсэн энэ системийн хэрэг нь гарч 16 жилийн өмнө болсон шиг үерийн гамшиг нүүрлэсэнгүй гэжээ.
Эх сурвалж: ВВС
