Өнөөдөр есдүгээр сарын нэгэн.
2021-2022 оны хичээлийн жилд цар тахлын нөхцөл байдалтай холбогдуулан сургуулийн өмнөх боловсролд эхний ээлжид өмнө нь цэцэрлэгт хамрагдаж байсан дөрвөн настнууд, мөн таван настнуудыг бүрэн хамруулахаар болсон. Харин хоёр ба гурван настай хүүхдүүд эцэг эх, асран хамгаалагчийн асаргаанд үлдэх бөгөөд цаашид халдварын нөхцөл байдлаас шалтгаалж цэцэрлэгт явуулах эсэхийг шийдэхээр болсон юм.
Боловсрол, шинжлэх ухааны сайд, Эрүүл мэндийн сайд нар хамтран тушаал гаргаж, цэцэрлэг, сургуулийн ажиллах журмыг энэ сарын 19-ний өдөр батлав.
Уг журмын дагуу цэцэрлэг, сургуулийн анги, бүлгийн өрөөний нэг хүүхдэд ногдох талбайг 1.5 ам метрээс доошгүй байхаар тооцож, 20+5 хүүхэд хүлээн авна. Танхимын сургалтад хамрагдах хүүхдийг тэдний эцэг эх, асран хамгаалагчийн саналыг харгалзан хүлээн авах юм.
Цэцэрлэгийн орчинд дараах тохиолдолд танхимын сургалтыг зогсоож, долоо хоногийн хугацаатай зайн сургалтад шилжинэ. Үүнд:
- Тухайн нэг бүлгээс халдварын тохиолдол батлагдсан нөхцөлд тухайн бүлгийг
- Ангийн байрлалаас хамаарч тухайн давхар, жигүүрийн гурав хүртэл бүлэгт халдварын тохиолдол батлагдсан нөхцөлд тухайн давхар, жигүүрийн бүлгүүдийг
- Өөр хоорондоо хамааралгүй (нэг жигүүр, нэг давхар биш, анги болон багш солигддоггүй) гурав ба түүнээс дээш бүлгийн дотор халдварын тохиолдол батлагдсан нөхцөлд цэцэрлэгийн бүх бүлгийн танхимын сургалтыг зогсоож, долоо хоногийн хугацаатай зайн сургалтад шилжүүлнэ.
Хэрвээ ойрын хавьтал болсон бол долоо хоногийн хугацаатай гэрийн тусгаарлалтад ажиглана. Хэрвээ халдвар илэрч зайн сургалтад шилжсэн бол тухайн бүлгийн хүүхэд, багш ажилтныг зургаа дахь хоногт шинжилгээнд хамруулах ажлыг харьяа эрүүл мэндийн байгууллага хариуцан зохион байгуулахаар заажээ. Шинжилгээний хариу сөрөг гарсан бол танхимын сургалтад хамруулах юм байна.
ЭЦЭГ ЭХ, АСРАН ХАМГААЛАГЧИД ЮУН ДЭЭР АНХААРАХ ВЭ
Эцэг эх, асран хамгаалагч нар гэр бүлийн хүрээнд хүүхдүүддээ гараа сайн угаах, ам хамраа гарын шуугаар зөв дарж ханиаж найтаах, аяга халбага, тоглоом зэргийг дамжуулан хэрэглэхгүй байх талаар зааж зөвлөхийг анхааруулж байна. Хүүхдийнхээ биеийн байдлыг тогтмол ажиглах, шинж тэмдэг илэрсэн бол цэцэрлэгт явуулахгүй бөгөөд энэ талаар багшид нь мэдэгдэх ёстой.
Мөн хүүхдүүд гэрээсээ ууж идэх зүйл, тоглоом авч явахгүй байхад анхаарах хэрэгтэй.
Түүнчлэн цэцэрлэгт гаднын хүн оруулахгүй бөгөөд эцэг эх асран хамгаалагч цэцэрлэгийн орох гарах хаалгаар хүүхдээ хүлээлгэн өгч авах юм байна. Энэ үедээ зай баримтлах шаардлагатай гэжээ.
Хүүхдүүд цэцэрлэгт орох, гарахдаа амны хаалтаа зүүх ба анги дотроо хэрэглэхгүй юм. Ангид шүдийг нь угаалгахгүй тул хүүхдийнхээ шүдийг өглөө оройд гэрт нь сайтар угаалгаж байхыг сануулжээ. Мөн хүүхдүүд гэрээсээ ууж идэх зүйл, тоглоом авч явахгүй байхад анхаарах хэрэгтэй.
БАГШ, АЖИЛТНУУД, ЦЭЦЭРЛЭГИЙН УДИРДЛАГА ЮУН ДЭЭР АНХААРАХ ВЭ
Цэцэрлэгийн орчны ариун цэвэр, халдваргүйтгэлийг сайтар хийж, агааржуулах, гар халдваргүйжүүлэх бодис тавихыг журманд тусгажээ.
Мөн дотоод орчинд багш, ажилтнууд амны хаалт хэрэглэх, хүүхдийн гадуур хувцсыг хувцасны уутанд хийж өлгөх, ангид шүдийг нь угаалгахгүй байх, гар нүүрийн алчуурыг өдөр бүр солих, хүүхдүүдийн хоолой амыг сод, давсны уусмалтай усаар зайлуулж хэвшинэ. Түүнчлэн,
- Хоолны ширээг зайтай байрлуулан, хүүхдүүдэд хоорондоо ярихгүй байх, аяга таваг дамжуулан хэрэглэхгүй байх, хүүхдийн тоглоомыг өдөр бүр цэвэрлэж ариутгах
- Хүүхдийн гарыг халдваргүйжүүлэх уусмалаар ариутгахгүй, зөвхөн савандаж угаах
- Ариун цэврийн хэрэгсэл, хичээлийн хэрэглэгдэхүүнийг гурван сар хэрэглэх хэмжээгээр бэлтгүүлэн авах
- Дулааны улиралд гадна талбайд хөдөлгөөн дэмжих сургалт явуулж болно
- Хүүхэд, багш, ажилтан, эцэг эх, асран хамгаалагчийг хамруулсан уралдаан, тэмцээн, аялал зугаалга зохион байгуулахгүй
- Цэцэрлэгийн байранд бөөгнөрөл үүсэхээс сэргийлж, хүүхэд хүлээн авах, тарах цагийг уян хатан байлгах, цэцэрлэгийн байранд орох, гарах боломжит бүх хаалгыг ашиглах
- Тусгай хэрэгцээт хүүхдийн хөгжлийг дэмжих ганцаарчилсан сургалтыг тэдний онцлог, хэрэгцээнд нийцүүлэн, эцэг эх, асран хамгаалагч зөвшөөрсөн тохиолдолд танхимын сургалтад хамруулна гэж заажээ.
Мөн өдөр бүр хүүхэд, багш, ажилтнуудаас эрүүл мэндийн тандалт авч, өвчний шинж тэмдэг илэрсэн тохиолдолд гэрт нь буцааж, эмнэлэгт хандахыг зөвлөх юм байна. Түүнчлэн цэцэрлэгт ирээгүй хүүхдийн эцэг эхтэй холбогдож шалтгааныг тодруулах, ковидоор өвдсөн эсэх судалгааг нийтийн дунд зохион байгуулахгүй байж, мэдээллийг нууцалж, аливаа хэлбэрийн ялгаварлан гадуурхалтад өртөхөөс сэргийлэхийг тусгажээ.
