УБТЗ ХНН-ийн даргын суудал эзэнгүй болоод удаж буй. Даргын суудалд горилж буй хүмүүсийн тухай яриа улс төрийн хүрээнээс мэр сэр сонсогдож байсан. Түүнчлэн Оросын талаас орос хүнийг захирлаар тавих шаардлага тавьсан гэх мэдээлэл цацагдсан.
Улаанбаатар төмөр замын удирдлагын асуудлаар ОХУ-аас Монголд суугаа Элчин сайд И.К.Азизоваас тодрууллаа. Тэрбээр “Улаанбаатар төмөр зам ХНН-ийн даргаар Монгол Улсын иргэн сонгогдох талаарх хэлэлцээрт хоёр талын албаны хүмүүс 2009 онд хүрсэн байдаг. Шинэ дарга томилох асуудлыг зургаан гишүүнээс бүрдсэн удирдах зөвлөл шийднэ. Удирдах зөвлөлд хоёр улсаас тус бүр гурван гишүүн багтдаг. Монголын талаас Улаанбаатар төмөр зам ХНН-ийн даргад томирох хүмүүсээ нэр дэвшүүлсэн. Удирдах зөвлөл удахгүй шийдвэрээ гаргах байх” гэлээ.
Эргэн сануулахад Монгол Улсын хувь нийлүүлсэн УБТЗ нийгэмлэг хоёр удирдлагатай. Монгол, Оросын талын хувь нийлүүлэгч буюу 50, 50 хувийг эзэмшигч нь Оросын төмөр замын ерөнхий захирал, Монголын талаас Улаанбаатар төмөр замын ерөнхий захирал.
Энэ хоёр хувь нийлүүлэгчийн доор ААН-ийн тухай хуулиар ТУЗ буюу Монгол, Оросын талаас гурав, гурван хүнтэй ерөнхий хороотой. Хэрэв “УБТЗ” ХНН Монгол дарга байвал Оросын тал ерөнхий хороог ахалдаг, харин Орос удирдлагатай бол Монголын талаас ерөнхий хороог удирддаг зарчимтай аж. Ерөнхий хороо нь Монгол, Оросын талаас тус бүр гурван гишүүний бүрэлдэхүүнтэй ажилладаг.
“УБТЗ” ХНН-ийн Ерөнхий хорооны одоогийн бүрэлдэхүүн:
Монгол Улсын талаас:
Ж.Бат-Эрдэнэ – Ерөнхий хорооны орлогч дарга, Зам, тээврийн хөгжлийн дэд сайд
Б.Артур – Зам тээврийн хөгжлийн яамны төмөр зам, далайн тээврийн бодлогын хэрэгжилтийг зохицуулах газрын дарга
Н.Буяндэлгэр – ЗГХЭГ-ын ахлах референт
ОХУ-ын талаас:
С.А.Павлов – “Оросын төмөр замууд” НХН-ийн Ерөнхий захирлын нэгдүгээр орлогч, Улаанбаатар төмөр зам ХНН-ийн Ерөнхий хорооны дарга
В.А.Токарев – ОХУ-ын Тээврийн дэд сайд бөгөөд Холбооны төмөр замын агентлагийн дарга
А.М.Чабунин – “Оросын төмөр замууд” НХН-ийн Ерөнхий захирлын орлогч бөгөөд дотоод хяналт, аудитын газрын дарга
