®Хүнс, хөдөө аж ахуй, хөнгөн үйлдвэрийн яамнаас өнөөдөр цаг үеийн асуудлаар мэдээлэл хийсэн.
Энэ үеэр Хүнс, хөдөө аж ахуй, хөнгөн үйлдвэрийн сайд З.Мэндсайхан махны нөөц бүрдүүлэлт, үнийн тогтвортой байдалд анхаарч байгаа талаар хэллээ.
“Өнөөдрийн байдлаар 6.1 мянган тонн мах нөөцөлсөн байна”
Тэрбээр “Энэ жил коронавирусийн нөхцөл байдлаас хамаарч импортлогч орнууд манай улсаас мах авахгүй гэсэн шийдвэрийг өнгөрсөн зургаадугаар сард гаргасан тул манай улс махаа экспортолж чадахгүй байгаа.
Тиймээс дотоодын махны худалдааг дэмжих зорилгоор энэ жил төв суурин газарт махны нөөц бүрдүүлэх чиглэлд илүү онцгой ажиллаж байна. Энэ хүрээнд нөөцийн мах бэлтгэлд Засгийн газраас 100 тэрбум төгрөгийн 3 хувийн хүүтэй хөнгөлөлттэй зээлийн эх үүсвэрийг шийдсэн. Үүнд нийт 17 аж ахуйн нэгж хамрагдаж, одоогийн байдлаар 81 тэрбум төгрөгийн хөнгөлөлттэй зээл арилжааны банкууд дээр гарсан байна.
Өнөөдрийн байдлаар үйлдвэрийн агуулахад 6.1 мянган тонн мах нөөцлөгдсөн байна. Бид нөөцийн махаа харьцангуй эрт бэлдэж чадаж байна гэж харж байна. Энэ жил нийт 15 мянган тонн мах бэлтгэх зорилттой байгаа.
Түүнчлэн Хөдөө аж ахуйг дэмжих санд бизнесийн зорилгоор нөөцийн мах бэлдэнэ. Аймаг орон нутгаас орж ирж байгаа стандарт, хүнсний эрүүл ахуйн шаардлага хангасан махыг хөдөө аж ахуйг дэмжих санд бэлтгэнэ. Нийт 5,000 орчим тонн махыг нөөцлөх төлөвлөгөө гаргасан.
Ингэхээр хавар иргэдийн хүнсний гол хэрэгцээ болдог махны нөөцийг тодорхой түвшинд хангалттай бэлдэж, үүнийг дагасан үнийг тогтвортой байлгах бодлого байна. Энэ хүрээний зохион байгуулалтын ажлыг хийж дууссан. Үүнтэй холбоотойгоор удахгүй Улаанбаатар хотын 31 байршилд хөдөө аж ахуйн гаралтай өргөтгөсөн худалдааг зохион байгуулахаар болсон.
Улаанбаатар хотын иргэдийн мах болон цагаан идээний хэрэглээг хямд үнээр дундын зуучлал орохгүйгээр нийлүүлэх шийдвэр гаргасан. Өөрөөр хэлбэл, аль нэг ченж болон худалдааны байгууллагын нугалаа орохгүйгээр орон нутагт бэлтгэсэн мах болон цагаан идээг тээврийн зохион байгуулалттайгаар оруулан ирж, хямд өртгөөр төв суурин газрын иргэдэд нийлүүлнэ гэсэн үг.
Тухайн худалдаанд хамт зүхэж, жижгэрүүлэх зэрэг үйлчилгээг хамт төвлөрүүлж иргэдийн өвлийн идшээ бэлтгэх арга хэмжээг хамтдаа зохион байгуулахаар цэг байршлуудыг тодорхой болгосон” гэв.
“Энэ жил ХХААХҮЯ нөөцийн махны бүрдүүлэлт болон борлуулалт дээр хяналт тавин ажиллана”
Үргэлжлүүлэн “Цар тахлын улмаас дэлхий дээр хүнсний бүтээгдэхүүний үнэ 20-30 хувь өссөн. Энэ нь эргээд иргэдийн нуруунд ачаалал болж бууна. Үүнээс л Засгийн газар урьдчилан сэргийлэх арга хэмжээ авч байгаа.
Бидний гол хүнсний хэрэглээ бол хүнсний ногоо, гурил, мах зэрэг байна. Импортын хүнсний бүтээгдэхүүний нөөцийг бүрдүүлэх чиглэлд ажлын хэсэг гаран ажиллаж байна.
Өнгөрсөн долоо хоногоос хүлэмжийн хүнсний ногоо, будаа, элсэн чихрийн импортын нийлүүлэлт тогтворжиж, тээвэрлэлт нь хэвийн болж, нөөц бүрдсэн. Хоёрдугаар сараас хойш махны хомсдолд ороод ирдэг. Махны нөөцийг сайн бүрдүүлж, үнийг тогтвортой байлгана.
Өмнө нь нөөцийн махны түгээлт нийслэлээр дамжин явагддаг байсан бол энэ жил Хүнс, хөдөө аж ахуй, хөнгөн үйлдвэрийн яам өөрөө махны нөөц бүрдүүлэлт болон борлуулалт дээр хяналт тавин ажиллана” гэдгийг нэмж хэлсэн юм.
“Нөөцийн мах бүрдүүлэлтийн 60 хувь нь хонины мах байна”
ХХААХҮЯ-ны Хүнсний үйлдвэрийн бодлогын хэрэгжилтийг зохицуулах газрын дарга Т.Гантогтох “Нөөцийн махны бүрдүүлэлтийн тухайд хонины мах 60 хувь, үхрийн мах 30 хувь, ямааны мах 10 хувь байна. Яамны зүгээс тогтвортой үнийг баримталж, үнийн хөөрөгдөл бий болгохгүйгээр нийлүүлэлтийг зохион байгуулахаар ажиллаж байна” хэмээв.
