Ардчилсан намын удирдлагууд мэдээлэл хийлээ.
Ардчилсан намын дарга М.Тулгат “Өнөөдөр Монгол оронд иргэд, хувийн хэвшил, бизнесийн байгууллагууд маш хүнд байдалд орчихоод байна. Сүүлийн арван жилд нэг хүнд ногдох дотоодын нийт бүтээгдэхүүн 4000 мянган доллар дотроо эргэлдлээ. Өөрөөр хэлбэл 10 жилийн туршид эдийн засаг тэлээгүй. Гэтэл энэ хугацаанд улсын нэгдсэн төсөв тав дахин өссөн.
Үндсэндээ 30 жилийн ардчилал зах зээлийн эдийн засагт шилжсэнээс хойш өнөөдөр хувийн секторийг боймлож төр улам данхайж, бизнес эрхлэгчид өнөөдөр туйлын хүнд байдалд орсон байна. Хил гааль дээрх асуудлыг шийдэж чадахгүй байна. Дунд шатны хэдэн хурган дарга нараас болоод хоёр улсын хооронд хил гаалийг нээх асуудал хойшлогдоод байна.
Үндсэндээ ЖДҮ, хувиараа бизнес эрхлэгчид өнөөдөр үстэй толгойгоо зулгааж байна. Иргэд туйлдаж байна. Нөхцөл байдал ийм байгаа үед Ардчилсан нам дотоод асуудлаа яаралтай шийдэх шаардлагатай. Хоёр талд байгаа залуучууд аль аль ярилцаж байна. Хэдийгээр хууль шүүх тамганы асуудал байгаа ч гэсэн ардчилсан нам үзэл санаа бодлого дээрээ нэгдэн нийлэх ёстой. Энэ хэрэгцээ байгаа учраас Ардчилсан намын бодлого стратегийн нэгдсэн зөвлөлийг байгуулсан. Цаашдын намын чанарын хувь нэгтгэх яриа хэлцэл хийж байна. Улсын дээд шүүхээс хоёр талаас өгсөн материалын аль нэгийг нь бүртгэсэн байхад нөгөө талаас ямар нэг гомдол гаргахгүй хүлээж авна гэдэг бичиг хүргүүлэхээр бэлдсэн.
Энэ бүхэн Ардчилсан намын дотоод асуудлыг шийдэхэд хурдасгах хүч болно. Улсын дээд шүүх хууль журмын дагуу асуудлыг шийдэж өгнө гэж итгэж байна. Ямар нэг улс төрчийн захиалга, улс төржилт бүү ороосой. Учир нь энэ бол нэг намын асуудал биш, Монголын тусгаар тогтнол бие даасан байдал парламентын ардчиллын асуудал болчихлоо” гэлээ.
