Охин ахынхаа хамт эцэг эхгүй, өнчин хоцрохдоо дөнгөж 6 настай байжээ.
Ээж нь шаргуу хөдөлмөрлөн, амьдралаа авч явж байсан ч эцэстээ шантран, нэг удаа амиа хорлох гэж оролдсон байна. Тэр үед гар утас гэж байсангүй. Гудамжины таксофон утсаар цаг алдахгүй дуудлага өгч амийг нь аварч болох байсан ч, амиа хорлох оролдлого гарсан тухай түргэн тусламжийн эмч рүү дуудлага өгч байгаа хүүхдүүдэд тоглоом хийж байна гээд хэн ч итгэхгүй байсан учраас хэн ч утсаар ярьсангүй.
Эмч ирэхэд бүх зүйл хожимдсон байжээ. Ээж нь ямар нэгэн мэргэжилгүй худалдагч, үйлчлэгч, цэвэрлэгч гээд юу таарсанаа хийдэг байж. Санхүүгийн бэрхшээл, хүүхэдтэй холбоотой асуудлууд, бүтэл муутай гэрлэлт, эр нөхрийн байдал зэрэг нь амиа хорлох шийдвэр гаргахад хүргэжээ.
Эцэг нь архинд орж, гэр бүлийнх нь аж амьдрал анхаарал татах асуудал биш, архины мөнгө олох нь л чухал байсан байна.
Тэр үеэс эхлэн охин ахынхаа хамт авга ах, 68 настай эмээгийн хамт амьдарч эхэлжээ. Эцэг гэж нэрлэдэг хүнээс хөндийрч, уулзах цаг зав гарах шаардлага байхгүй гэж үзэж. Асран хамгаалахаар авсан хүмүүс нь ч хориг тавьж.
Гэвч нэг удаа нууцаар уулзахаар очсон боловч, уулзалт бүтэлтэй болсонгүй. Архинд толгойгоо мэдүүлсэн эрд хүүхдүүд нь аль хэдийн илүүц зүйл болсон байжээ.
2000 онд эцгийн талын хамаатан садангууд нь Ольгад эцэг нь архиа ууж яваад нас барсан тухай хэлсэн байна. Эмээ нь ах дүү хоёрыг хатуу гараар хүмүүжүүлэхээр шийдэж.
Өөрөө ч дайны үед өсөж өндийн, мөн таван хүүхдээ цэргийн диктатурын аргаар өсгөсөн хүн байж. Эмээгийн хүмүүжлийн арга маш хатуу, зарим үед бараг харгислал болох тохиолдол болдог байсан байна. Ольга энэ талаар эмээтэйгээ ярилцах оролдлого бүхэн нь бүтэлгүй болдог байж.
Тэдний аж байдлын талаар мэдэх зарим нэг хүмүүс охиныг үрчилж авах санал ч тавьдаг байж. Охиныг гуравдугаар ангид байхад нэгэн дасгалжуулагч багш сургууль дээр нь ирж тэшүүрийн спортоор хичээллэхийг хүүхдүүдэд санал болгосноор Ольга тэшүүр сонирхож эхэлсэн байна.
Эхний үед Ольга тодорхой амжилт үзүүлж чадахгүй л байлаа. Гэтэл тэмцээний ялагч нарт өгч байгаа шагнал урамшуулалд жаахан охин сэтгэл татагдаж эхэлсэн байна. Иймээс бэлтгэл сургуулилтанд илүү хамрагдаж, тэмцээн уралдаанд оролцох болж, гол нь хатуу ширүүн эмээгийн хараа хяналтаас хэсэгхэн хугацаанд ч гэсэн хол байх нь чухал байж.
Түүний амжилт 9 настай байхад аажим аажмаар дээшилж эхлэн, тэшүүрийн секц дугуйлан бүртгэн авчээ. Түүнд хуучин тэшүүр өгч, бас хэд хэдэн охидийн өмсөж байсан хуучин комбинзон өгсөн байна. Өглөө нь Ольга тэр комбинзоныг өмсөж бэлтгэл хийнэ, орой нь өөр хэн нэгэн хэрэглэнэ.
Ингэж явсаар Ольга ОХУ-ын хүүхдийн аварга шалгаруулах тэмцээнд түрүүлснээр өөрийн гэх комбинзонтой, дараа нь хувьдаа тэшүүр, пүүзтэй болсон байна.
Дээр нь сарын 2000 рублийн цалин авдаг болжээ. Тэр үед Ольга 14 нас хүрсэн байлаа. Өнөөдөр энэ эмэгтэй ОХУ-ын нийт багийн өмнөөс Бээжин 2022 өвлийн олимпийн наадмын нээлтийн ажиллагаанд багийнхаа тугчинаар жагслаа.
