Сонгууль маш өрсөлдөөнтэй болж, санал тооллогын эцсийн мөчид ялагч тодорсон юм. Юн Сук Ёл ердөө 250 мянган сонгогч буюу 0.8 хувийн саналаар ялалт байгууллаа. Харин түүний өрсөлдөгч, эрх баригч “Ардчилсан нам”-ын нэр дэвшигч Ли Жэ Мён 47.79 хувийн санал авсан юм.
Сонгуульд сонгуулийн насны нийт 44.19 сая иргэн бүртгэгдсэнээс 77.1 хувийн ирцтэй өндөрлөжээ. Энэ удаагийн сонгуулийн ирц 2017 оны Ерөнхийлөгчийн сонгуультай харьцуулахад 0.1 хувиар буурсан байна.
Өмнөд Солонгосын шинэ Ерөнхийлөгч Юн Сук Ёл гэж хэн бэ
Тэрээр 1960 оны арванхоёрдугаар сарын 18-нд Өмнөд Солонгосын нийслэл Сөүл хотод төрсөн. Түүний аав Юн Ки Жун нь багш бөгөөд Өмнөд Солонгосын Статистикийн нийгэмлэгийн үүсгэн байгуулагч юм. Юн Сук Ёл Сөүлийн их сургуулийг хуульч мэргэжлээр төгссөн.
Гэхдээ их сургуулийн төгсөх шалгалтандаа есөн удаа унаж байсан гэх мэдээлэл байна. Тэрээр энэ явдлаа 1980 оны ардчиллын төлөөх оюутны бослогод идэвхтэй оролцож, тухайн үеийн эрх баригчдыг хурцаар шүүмжилж байсантай холбон тайлбарладаг.
Тэрээр 2016 онд Өмнөд Солонгосын Ерөнхийлөгч асан Пак Гын Хэд холбогдох авлигын хэргийн мөрдөн байцаалтыг ахалж байсан. Юн Сук Ёл прокурорын хувиар Өмнөд Солонгосын Ерөнхийлөгч асан Ли Мён Бак, Пак Гын Хэ, тагнуулын газрын гурван дарга, нэг ерөнхий шүүгч, 100 гаруй өндөр албан тушаалтан, “Samsung” болон “Hyundai” корпорацын удирдлагуудыг яллаж байсан аж. Улмаар Юн Сук Ёл 2019 онд Өмнөд Солонгосын Ерөнхий прокуророор томилогдон ажиллаж байв.
Юн Сук Ёл Ерөнхийлөгчийн сонгуульд ялалт байгуулсан тохиолдолд хөдөлмөрийн хөлсний доод хэмжээг цуцлахаа мэдэгдсэн. Мөн Өмнөд Солонгосыг дахин цөмийн зэвсэгтэй болгоно гэж мэдэгдэж, АНУ-ыг Өмнөд Солонгосын нутаг дэвсгэрт дахин стратегийн зэвсгийг байршуулахыг шаардсан удаатай. БНХАУ-ын Гадаад хэргийн яам Юн Сук Ёлын энэхүү мэдэгдлийг тун хариуцлагагүй гэж тодорхойлон, хүчтэй эсэргүүцэж байсан юм.
