УИХ-ын гишүүн С.Бямбацогтоос Ерөнхий сайд Л.Оюун-Эрдэнэд хандан Эрдэнэбүрэнгийн усан цахилгаан станцын ашиглалтад оруулах хугацаа, нөлөөллийн бүсэд амьдарч байгаа айл өрх, иргэдэд нөхөн олговор олгох зэрэг асуудлаар асуулга хүргүүлсэн байна.
Уг асуулгын хариуг Эрчим хүчний сайд Н.Тавинбэх мэдээлэл өглөө.
Тэрээр “Эрдэнэбүрэнгийн усан цахилгаан станцын төслийн тендерт China CAMC Engineering Co.,Ltd болон Shanghai Constuction Croup хамтарсан консерциум шалгарсан. Тус компани барилга угсралтын ажлыг 2022 онд багтаан эхлүүлэхээр ажиллаж байна. 61 сарын хугацаанд барьж дуусган, шинээр усан сан үүсгэж, 2027 онд ашиглалтад оруулах төлөвлөгөөтэй байна.
Хөрөнгө оруулалтын хувьд БНХАУ-аас нэг тэрбум ам. долларын хөнгөлөлттэй зээлийн хөрөнгөөр барих төсөл хөтөлбөрийн жагсаалтад Эрдэнэбүрэнгийн усан цахилгаан станц төслийг оруулсан. Төслийн нийт өртөг 271.4 сая ам.доллар болно.
БНХАУ-ын ЭКСИМ банкны зүгээс Эрчим хүчний яаманд хандаж зээлийн үнийг дүн 250 сая ам.доллароос дээш тул зээлийн тусгайлсан хэлэлцээрийн Төрийн зөвлөлийн хурлаар батлуулах шаардлагатай болохыг мэдэгдсэн. Төрийн зөвлөлийн хурал нь ойролцоогоор нэг жил орчмын хугацаа зарцуулдаг тул Монголын талаас шалтгаалахгүйгээр хойшлохоор байна.
Улсын тусгай хэрэгцээнд авсан 28 мянган га газрын 9,871 га газарт шинээр усан сан үүсэх бөгөөд энэхүү газар нутагт амьдарч буй 270 өрх төслийн нөлөөлөлд өртөхөөр байгааг тогтоосон. Үүнд Увс аймгийн Өмнөговь сумын нутагт Ховд голын баруун захаар амьдарч буй 125 өрх, Баян-Өлгий аймгийн Баян-Уул сумын нутаг Ховд голын баруун захаар амьдарч буй 145 өрх, нийт 84 байрлалд байгаа 264 иж бүрдэл түүх соёлын түүх дурсгалын тус тус нүүлгэн шилжүүлэх судалгаа хийгдсэн. Үүнд шаардлагатай төсвийг 2022-2015 оны улсын төсөвт суулгахаар төлөвлөсөн.
Энэ онд нийт 91 өрхийг нүүлгэн шилжүүлэх санхүүжилтийг улсын төсөвт тусгасан. Төслийн нөлөөлөлд автах иргэдийн дийлэнх нь газраа өмчлөн аваагүй нь одоо мөрдөгдөж буй Газрын тухай хуулийн дагуу нөхөн олговор олгоход хүндрэл учруулж байна. Иймд нөлөөлөлд автаж буй 270 өрхийн 1,251 иргэнд 2022-2024 онуудад иргэн бүрд хөдөлмөрийн хөлсний доод хэмжээг 36 сараар тооцсонтой тэнцэх хэмжээний нөхөн олговор олгох асуудлыг Засгийн газар шийдвэрлэсэн.
Одоо мөрдөгдөж буй хуулиар нөлөөлөлд автсан иргэдийн нүүлгэн шилжүүлэх болон үндсэн хөрөнгийг үнэлж тэр хэмжээгээр нөхөн олговор олгодог. Гэвч энэ нь малчин болон тариалан эрхэлдэг иргэдэд тохирохгүй байна.
Энэ аргачлалаар тооцвол доод тал нь 270 мянган төгрөг авахаар байна. 270 өрхөөс 100 орчим нь 270 мянгаас 10 сая төгрөгийн нөхөн олговор авахаар байна. Малчин өрхөд үндсэн хөрөнгийг шинж агуулсан хөрөнгө нь өвөлжөө, хаваржааны хашаа л байдаг. Энэ бол үнэлгээний буруу биш, малчин өрхөд үндсэн хөрөнгө бага байдагтай холбоотой.
Тиймээс Засгийн газраас тэнд оршин суудаг иргэн бүрд 15,100,000 төгрөгийг биет бус нөлөөллийн нөхөн олговор гэж олгоно” гэв.
