Жил бүрийн тавдугаар сарын 15-нд Олон улсын гэр бүлийн өдөр тохиодог. Энэ өдрийг 1994 оноос дэлхий нийтээр тэмдэглэн ирсэн. Монгол Улс энэ өдрийг 2003 оноос тэмдэглэж буй юм.
Энэ өдрийг угтан Нийслэлийн Гэр бүл, хүүхэд залуучуудын хөгжлийн газраас санаачлан Гэрлэх ёслолын ордонтой хамтран “Дурсамж” гэрлэх ёслолын үйл ажиллагааг өнөөдөр /2022.05.10/ зохион байгууллаа.
Залуу хосын амьдралд тохиох, дахин давтагдашгүй баярт мөчийг мөнхлөн үлдээх зорилгоор энэхүү арга хэмжээг зохиожээ. Нийт 60 хосын хуримын ёслол энэ сарын 10-12-ны өдрүүдэд болох юм байна.
Нийслэлийн гэр бүл, хүүхэд залуучуудын хөгжлийн газрын дарга Ө.Ган-Өлзий “Гэр бүлийн асуудал хувийн шинжтэй боловч нийгмийн үндсэн нэгж юм. Орчин үед хүмүүс хоорондын харилцаа техник технологиос шалтгаалан хөндийрөх хандлага ажиглагддаг.
Улмаар ёс суртахуунтай хүнлэг байх, нэгнээ хайрлах, хүндлэх, дэмжиж туслах, сонсож ярилцахад зориулах цаг багассаар байна. Иймд гэр бүл бүхэн халуун ам бүлээрээ хамтдаа өнгөрөөж байгаа цаг мөч болгоныг эерэг уур амьсгалтай, нэгнээ дэмжсэн, хүүхэд хөгшдөө асарч хамгаалсан аз жаргалаа хамтдаа бүтээсэн амьдралыг бий болгоосой гэж уриалж байна.
Нэг гэр бүлийн аз жаргалаас, нийгмийн уур амьсгал хамаардаг. Тиймээс Монгол Улсын урт хугацааны хөгжлийн бодлого “Алсын хараа-2050″ баримт бичгийн хоёрдугаар зорилгын хүрээнд аз жаргалын индексээр эхний арван орны тоонд багтах том зорилгыг дэвшүүлсэн” гэв.
