Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадмын нээлт 11:20 цагт Төв цэнгэлдэх хүрээлэнд болно. Монгол Улсын Ерөнхийлөгч У.Хүрэлсүх наадмыг нээж үг хэлнэ.
Улсын баяр наадмын өнөөдрийн хөтөлбөрөөс онцолбол 1,024 бөхийн барилдааны нэг, хоёрын даваа, азарга, их насны хурдан морины уралдаан явагдана. Хүй долоон худагт хөхүүрийн айраг наадам эхэлнэ. Үндэсний сурын болон шагайн харваа Төв цэнгэлдэх хүрээлэнд үргэлжилнэ.
Ийнхүү Монголчууд цар тахлын улмаас хоёр жил өнжсөний дараа бүх нийтээрээ наадмаа тэмдэглэж байна.
Хүй долоон худаг руу нийтийн тээврийн автобус болон галт тэрэг дараах чиглэлээс иргэдэд үйлчилнэ.
- Соёмботой хөшөөнөөс Хүй долоон худаг руу 10 тээврийн хэрэгсэл 10 минутын зайтайгаар 1,500 төгрөгөөр үйлчилж байгаа.
- Вокзалаас 11, 12-нд морь барианаас нэг цагийн өмнө галт тэрэг хөдөлж байгаа. Галт тэрэг Давааны зөрлөг хүртэл 2,000 төгрөгөөр хүргээд тэндээс богино эргэлтээр нийтийн тээврийн таван автобус иргэдийг үнэ төлбөргүй зөөнө.
- 11-15-нд Хүй долоон худагт болох арга хэмжээтэй холбоотойгоор нийтийн тээвэр 18:00-03:00 цаг хүртэл Таван шар-Хүй долоон худаг гэсэн чиглэлээр таван тээврийн хэрэгсэл 1,500 төгрөгөөр үйлчилнэ.
Баяр наадмаар нийт 742 тээврийн хэрэгсэл, 383 такси үйлчилгээнд явах тул иргэдийг нийтийн тээврээр түлхүү үйлчлүүлэхийг албаныхан уриаллаа.
