Эрүүл мэндийн яам болон Халдварт өвчин судлалын үндэсний төвөөс цаг үеийн асуудлаар мэдээлэл хийлээ.
ХӨСҮТ-ийн ерөнхий захирал Ц.Билэгтсайхан “ХӨСҮТ нь аль хувилбар илүү давамгай тархалттай байна вэ гэдэг дээр хувилбарын тандалтын шинжилгээг хийдэг. Зургаадугаар сарын сорьцууд дээр ВА.4, ВА.5 хэв шинжүүд тодорхойлогдсон бол долдугаар сарын сорьцод ВА.5-ын дөрвөн хэв шинж 70 хувьд тодорхойлогдсон. Харин үлдсэн 30 хувь нь ВА.1 болон ВА.2-ын хэв шинжүүд тодорхойлогдсон байна.
Тэгэхээр ВА.5 хувилбар нь илүү давамгайлж халдварын үүсгэу байна гэж ойлгож болно. Энэ хувилбарын нууц үеийн хугацаа 2.4 хоног байгаа юм.
Нийт халдвар авч байгаа хүмүүсийг 4-ний гурав нь анх удаа халдвар авсан бол дөрөвний нэг нь давтан халдвар авчээ. Давтан халдварын хувьд 2-3 удаа өвчилсөн тохиолдлууд ч байна.
Өөрөөр хэлбэл, оны өмнө тархсан коронавирусийн альфа, дельта хувилбар болон оны дараа тархсан омикроны ВА.1, ВА2 хувилбараар өвчилсөн хүн одоо дахин халдвар авч байгаа тохиолдол гарч байна гэсэн үг.
Давтан өвдөж байгаа тохиолдлын хоорондын хугацаа нь 6.6 сар байгаа. Үүнээс харахад вакцины дараах болон халдварын дараах дархлаа, тогтсон эсрэг биеийн түвшин буурч байгаа хугацаатай тохирч байна. Өөрөөр хэлбэл, зургаан сарын дараа дахин халдвар авах эрсдэл өндөр байгаа юм” гэв.
