Д.Баярболд: Коронавирусээр өвчилсний дараах хор нөлөө маш их учраас хүүхдийн вакциныг олон улсад хүлээн зөвшөөрсөн

Коронавирусийн эсрэг вакцинд 5-11 настай хүүхдүүдийг сайн дурын үндсэн дээр хамруулах ажил улсын хэмжээнд өчигдөр эхэлсэн. Энэ талаар Эрүүл Мэндийн Яам (ЭМЯ)-ны Нийгмийн эрүүл мэндийн газрын дарга Д.Баярболдоос тодрууллаа.

-Манай улсын 5-11 насны хүүхдүүд коронавирусийн эсрэг вакцинд эцэг эхийн зөвшөөрөлтэй, сайн дурын үндсэнд хамрагдах шийдвэр өчигдрөөс хэрэгжиж байна. Одоогоор дэлхийн хэчнээн оронд хүүхдүүдийг КОВИД-19-ийн вакцинд хамруулж байна вэ?

-5-11 насны хүүхдийн вакцинжуулалтыг 2021 оны аравдугаар сард АНУ-д хийж эхэлсэн байдаг. Энэ шийдвэрийг тус улсын Хүнс, эмийн агентлагаас гаргасан. Үүний дагуу дэлхийн өндөр хөгжилтэй орнууд ч хүүхдийн дархлаажуулалтын ажлыг эхлүүлээд байна. Одоогоор,

АНУ, Канад, Сингапур, Европын холбооны зэрэг өндөр хөгжилтэй орнууд вакциныг 5-11 насны хүүхдүүдэд хийж байна. Австри, Бельги, Болгар, Эстони, Франц, Унгар, Итали, Норвеги, Мальт, Перу, Румын, Славян зэрэг улсад 5-9 насны хүүхдүүдийг коронавирусийн вакцинд хамруулж байгаа юм. БНХАУ болон Куба улсад 2-3 насны хүүхдүүдийг дархлаажуулалтад хамруулж байгаа бөгөөд дотооддоо үйлдвэрлэдэг вакциныг тарьж эхэлсэн талаарх мэдээ байна.

-КОВИД-19-ийн халдвар хүүхдүүдэд харьцангуй хөнгөн тусаж байгаа талаар эмч мэргэжилтнүүд мэдээлж буй. Үүнтэй холбоотойгоор хөнгөн тусах учир хүүхдүүдээ вакцинд хамруулах шаардлагагүй гэсэн ойлголт иргэдийн дунд цөөнгүй байна. Энэ талаар та тайлбарлахгүй юу?

-Мэдээж хүүхдүүдэд коронавирусийн хүндрэл, нас баралт нь насанд хүрэгчдийг бодвол маш бага. Гэхдээ пост ковид буюу өвчилсний дараа үзүүлэх хор нөлөө, шинж тэмдэг их хэмээн үзэж байгаа. Нэгдүгээрт, вакцинжуулалт нь хүндрэл нас баралтаас сэргийлж байна. Хоёрдугаарт, өвчлөхгүй байх нөхцөлийг бүрдүүлж байгаа. Түүнчлэн коронавирусийн халдвараар өвчилсний дараах пост ковидын шинж тэмдэг бага явагддаг гэдгийг ойлгох нь зүйтэй.

Нэмэлт тайлбар, омикроны BA.4, BA.5 хувилбараар хүүхэд өвчилсөн тохиолдолд эхний гурав хоног халуурч, ханиалгаж, хэвлийгээр өвдөх, бөөлжих, гүйлгэх, шинж тэмдэг илэрч байна.

-Хүүхдийн вакцинжуулалттай холбоотойгоор олон улсад хийсэн эрүүл мэндийн судалгаа, шинжилгээг танилцуулахгүй юу. Онцлох ямар үр дүн байна вэ?

-Вакцин тариулсан хүүхдийн гаж нөлөөний талаарх олон улсын судалгаа 2021 онд гарсан байдаг. Тодруулбал, 5-11 насны хүүхдэд вакцин тарих нь халдвараас үр дүнтэй хамгаалахаас гадна эрүүл мэндийн эрсдэлгүй хэмээх үр дүнг гаргасан.

Бидний хувьд 5-11 насны хүүхдийн вакциныг дэлхийн олон оронд хэрэглэсний дараагаар хэрэглэж буйгаар онцлог.

Нэмэлт тайлбар, Америкийн Нэгдсэн Улсад 5-11 насны найман сая орчим хүүхэд тус вакцинд хамрагджээ.

–Монгол Улсад өнгөрсөн долоо хоногт бүртгэгдсэн омикроны В.А 4, В.А 5 хувилбарын тархалт нийт коронавируст халдварын 70 орчим хувийг эзэлж байгаа талаарх мэдээлэл бий. Одоогоор халдварын нөхцөл байдал ямар байгаа бол?

-Өнгөрсөн долоо хоногийн халдварын мэдээллийг үүний өмнөх долоо хоногтой нь харьцуулахад,

Батлагдсан тохиолдлын тоо 58.3 хувиар
PCR шинжилгээний эерэг илрүүлэлт 33.96 хувиар тус тус өссөн үзүүлэлттэй байгаа.

Монгол Улсад коронавирусийн тав дахь давлагаа эхэлж байна. Тиймээс ч халдвараас сэргийлж, амны хаалт зүүх, зай барих, гарын ариун цэврийг сахих нь чухал.

Хүүхдийн вакциныг ӨЭМТ, сумын эрүүл мэндийн төв болон дархлаажуулалтын цэгүүдэд хийж байна. 5-11 насны хүүхдээ вакцинд хамруулахаар өрхийн эмнэлэг дээр ирэхдээ эцэг эхчүүд иргэний үнэмлэх, хүүхдийн төрсний гэрчилгээг авчрах шаардлагатайг өмнө нь мэдээлсэн.