ХЗДХ-ийн сайд Х.Нямбаатар Засгийн газрын хуралдаанаас гаргасан шийдвэрийг танилцуулсны дараа сэтгүүлчид түүнээс цаг үеийн зарим асуудлыг тодруулж, хариулт авсан юм.
-Тагнуулын ерөнхий газраас “Тусгаар тогтнол” хөдөлгөөнийхнийг зэвсэгт халдлага үйлдэх магадлалтай гэж үзэн өчигдөр орой /2022.08.02/ саатууллаа. Ардчилсан улс оронд үзэл бодлоо илэрхийлж байгаа иргэдийг яагаад саатуулан шалгах болов?
Сайд Х.Нямбаатар, Монгол бол бүрэн эрхт, тусгаар тогтносон улс. Тусгаар тогтносон улсын төв талбайд дахин тусгаар тогтнол гэсэн үг хэрэглэсэн экстремист шинжтэй үйл ажиллагаа явуулж, цэрэгжсэн зохион байгуулалтад шилжиж, нацист суртал ухуулга явуулж байгаа энэ үйлдлийг Тагнуулын байгууллагаас гэмт хэргийн шинжтэй гэж үзэж, эрүүгийн хэрэг үүсгэн шалгах зөвшөөрлийг Шүүх, Прокурорын байгууллагаас авсан. Энэ үйл ажиллагаа хуулийг дагуу явагдаж байгаа.
Шалгаж байгаа хэргийн талаар би үүнээс илүү мэдээлэл өгөх боломжгүй.
Тагнуулын ерөнхий газрын Мөрдөж шалгах албанаас шалгаж байгаа. Ардчилсан дэглэмтэй дэлхийн аль ч улсад тусгаар тогтнолтой зэрэгцэн цэрэгжсэн үйл ажиллагаа явуулахыг Үндсэн хууль болон холбогдох бусад хуулиар хориглосон байдаг.
Энэ үйлдэл зургаадугаар сарын 14-нөөс эхэлсэн. Эхлээд монгол үндэсний дээл хувцастай байсан. Сүүлдээ цэргийн зохион байгуулалт, цэргийн дүрмээр бие биедээ цэргийн цол хэргэм өгч, цаашлаад Үндсэн хууль болон Эрүүгийн хуулийн экстремист үйл ажиллагаа явуулахыг хориглосон холбогдох заалтад харшлах үйлдлүүдийг удаа дараа гаргасан учир Үндэсний аюулгүй байдлыг хангах чиг үүрэг бүхий байгууллага хуулийн дагуу шалгаж байгаа гэж ойлгож байна гэв.
