С.Эрдэнэ АН-ын асуудлаар мэдээлэл хийх үеэрээ өөрийгөө “хилийн хоригтой байгаа” гэдгээ мэдэгдсэн.
Тэгвэл С.Эрдэнийг буруутгаж буй нэг үндэслэл нь хамаарал бүхий хүн буюу охиндоо давуу байдал олгосон гэх хэрэг. Тодруулбал, “Дархан гурил тэжээл” ХК-ийн хуучин элеваторыг Хөгжлийн банкны хөрөнгөөр засаж улсад хохирол учруулсан гэх хэрэгт холбогдуулан яллагдагчаар татсан байна.
2014 онд тухайн үеийн Үйлдвэр, хөдөө аж ахуйн яамнаас “түлхүүр гардуулах” нөхцөлтэйгөөр Дархан-Уул аймагт үр тариа хадгалах 36 мянган тн-ын багтаамжтай, төмөр бетон хийцтэй элеватор худалдан авах “ТШ/2014/УТ/ЭЛ-/Бараа” гэсэн дугаартай тендер зарласан байдаг. Харин ХХААХҮЯ-ны Дотоод аудитын хорооныхны шалгалтаар тендерийн хорооныхон “Дархан гурил тэжээл” ХК-ийнханд давуу байдал олгосон заалт оруулж, бусад оролцогчдод ижил, тэгш өрсөлдөх боломж олгоогүй, мөн ТЭДС-д болон бусад байгууллагад 5.3 тэрбум төгрөгийн өртэй “Дархан гурил тэжээл”-ийг шалгаруулсан нь хууль зөрчсөн гэдэг.
Улмаар түлхүүр гардуулах нөхцөлийн дагуу 1982-1983 онд барьсан хуучин барилга, байгууламжийг 15.9 тэрбум төгрөгөөр үнэлж авсан нь өмнөх жилүүдэд худалдан авсан ижил хүчин чадалтай барилга байгууламжаас гурав дахин илүү үнэтэй, ашиглалтад хүлээн авснаас хойш жил гаруй болоход хэвийн үйл ажиллагаа явуулах боломжгүй байгууламж ТЭДС-д худалдан авсан нь тогтоогдсон байдаг.
Өөрөөр хэлбэл, 3.5 тэрбум төгрөгөөр хуучин элеватораа засчихаад, улсад 16 тэрбум төгрөгөөр үнэлж шахсан, дэлбэрсэн элеваторын хэрэгт холбогдуулан УИХ-ын гишүүн асан С.Эрдэнэ, түүний охин Э.Содгэрэл нарыг шалгаж байгаа гэсэн үг. Ийнхүү шалгах болсон үндэслэл нь дээрх тендер шалгаруулалтын дараа Э.Содгэрэл “Дархан гурил тэжээл” ХК-ийн 550 527 хувьцааны 152 131 ширхгийг нь эзэмшигч болсонтой холбоотой гэдэг. С.Эрдэнийг энэхүү хэрэгтэй холбогдуулан шалгаж, хилийн хориг тавьсан бололтой. Нөгөөтэй энэхүү хэргээрээ С.Эрдэнэ эрх баригчдийн “барьцаанд орж” өнөөдрийг хүртэл АН-аас явахгүй байгаа гэж хардах иргэд ч олон байдаг.
