“Чингис хаан” хаад язгууртны музейг нээлээ. Энэ үеэр Төрийн есөн хөлт цагаан тугийг тус музейд залж, Ерөнхийлөгч У.Хүрэлсүх, музейн захирал С.Чулуун нар үг хэлэв.
“Чингис хаан” хаад язгууртны музейн захирал С.Чулуун: Монголын барилгачид эрдэмтэн судлаачид, уран бүтээлчдийн уйгагүй хөдөлмөрөөр их хаанаа сүслэн дээдэлж энэхүү музейг бүтээлээ. Энэхүү бүтээн байгуулалт нь Монгол Улсад нийгэм, соёлын салбарт сүүлийн 30 жилд хийсэн хамгийн том бүтээн байгуулалт болж байна. Музей нь Ази тивдээ эхний 10-т багтах хэмжээтэй, эх үзмэрийнхээ эзлэх хувиар тэргүүлж, аюулгүй байдал, дохиолол хамгаалалт, хадгалалт хамгаалалтын хамгийн орчин үеийн шийдэлтэй. Мэргэжлийн боловсон хүчнээр бүрэн хангагдсан нүүдлийн иргэншлийн цогц түүхийг харуулж чадахуйц ордонтой боллоо.
Ерөнхийлөгч У.Хүрэлсүх: Монгол хүн бүр Их Монгол улсынхаа гал голомтыг сахин сууж байгаагаа гүнээ ухамсарлан, Эзэн богд Чингис хааны эш хөргийг эрхэмлэн дээдэлж, хүндэтгэн залж, суу алдар, үйл хэрэг, билиг сургаалыг эрхэмлэн дээдэлж даган мөрдөж, төрт ёсны үнэт зүйл, өв соёлыг үр хойчдоо өвлүүлэн үлдээж, эв эеэ бататган сахиж, улс орноо мандуулахад хувь нэмрээ оруулахыг Төрийн тэргүүний хувьд уриалсан.
Манай ард түмэн, үр хүүхэд, ирээдүй хойч үе минь эх орон ард түмэн, өвөг дээдэс, үүх түүх, үнэт зүйлээрээ бахархаж, эх оронч үзлийг төлөвшүүлэх, дэлхий дахинаа улс орноо сурталчилан таниулах аугаа түүхт Монгол үндэстний оюун санаа, зүрх сэтгэл, итгэл үнэмшлийн хувьд нэгтгэн зангидах, үндэсний эв нэгдлийг бэхжүүлэхэд үнэтэй хувь нэмэр оруулах болно.
Цаашид төр, эрдэмтэн судлаачид, үр хүүхэд, хойч үеийнхэн их хаадынхаа үйл хэргийг улам үргэлжлүүлэн судалж, сурталчлан таниулж, монгол түмний бүтээн байгуулалт бахдал омогшлын бэлгэдэл болсон энэхүү музейг өргөтгөн хөгжүүлж, үзмэр үйлчилгээ, сан хөрөнгийг нь арвижуулан баяжуулж дэлхий нийтийн анхаарлыг татсан түүхийн музей, олон улсын судалгааны төв болгон хөгжүүлэх учиртай.
Энэхүү музейг байгуулах шийдвэр гарсан өдрөөс хойш олон хүндрэлтэй тулгарсан ч богино хугацаанд чанарын өндөр түвшинд бүтээж чадлаа. Монголчууд бид мэдлэг чадвар, оюун ухаан, хүч хөдөлмөрөө нэгтгэн эрч хүчтэй хамтран ажиллаж чадах аваас ямар ч зүйлийг хийж бүтээж чаддаг ард түмэн болохоо энэхүү бүтээн байгуулалтаар нотлон харууллаа. Тус музей “Чингис хаан” судлалын олон улсын гол төв болж, их хаадын суу алдрыг дэлхий дахинаа үеийн үед түгээн дэлгэрүүлж байхын өлзийтэй сайхан ерөөлийг өргөн дэвшүүлье.
