Засгийн газраас “Эрдэнэс Тавантолгой” ХК-д Бүрэн эрхт төлөөлөгчөөр Ж.Ганбатыг томилж ажиллуулж буй. Түүнийг ажлаа авахад уурхайн аман дээр 500 машины цуваа үүсэж, нүүрсээ ачиж чадахгүй байсныг хэвийн үйл ажиллагаанд оруулсан гэлээ.
Энэ талаар Бүрэн эрхт төлөөлөгч Ж.Ганбат“Зохион байгуулалтыг оновчтой хийснээр уурхай дээр бөөгнөрсөн тээврийн хэрэгслийн тоог буурууллаа. Томилогдсоноосоо хойш 378 мянган тонн нүүрсийг уурхайгаас Цагаанхад руу тээвэрлэн борлуулж, 15.8 сая долларыг оруулсан. Энэ байдлаараа “Эрдэнэс Тавантолгой” ХК энэ ондоо багтаад 500 сая доллар оруулж ирэх бүрэн боломжтой. Хамгийн гол нь үйл ажиллагааг оновчтой зохион байгуулж, бусад төрийн байгууллагатай ажлын уялдааг хангах хэрэгтэй.
Намайг ажил авахад “Эрдэнэс Тавантолгой” ХК 200-300 орчим тээврийн хэрэгсэл 20-30 мянган тонн нүүрс экспортолж байсан. Би очиж ажиллаад 657 тээврийн хэрэгслээр 74.8 мянган тонн нүүрсийг гаргалаа. 500 сая долларыг Монгол Улс руу оруулж ирэхэд хамгийн багадаа өдөрт 84 мянган тонн нүүрсийг уурхайгаас Цагаанхад руу тээвэрлэн цаашаа экспортлох шаардлагатай. Сардаа 2.5 сая тонн нүүрс гаргаж байж 500 сая доллар оруулж ирэх юм. Ингэснээр Засгийн газрын үүрэг даалгаврыг биелүүлэх юм.
Оффтейк нөхцөлтэй дөрвөн гэрээ байна. Нэг нь маш нууцын зэрэглэлтэй, өөр нэг нь нууцын зэрэглэлтэй байгаа юм. Засгийн газраас энэ гэрээг ил болгох үүрэг өгсөн. Харилцах хүмүүсээс зөвшөөрөл авч байж ил болгоно. Би аравдугаар сарын 26-нд томилогдсон. Гэтэл өмнөх өдөр буюу аравдугаар сарын 25-нд 70 тэрбум төгрөгийн гэрээг нэг компанитай байгуулсан байна. Урьдчилгаа төлбөр гэж 20 тэрбумын гүйлгээ хийлгэхээр над дээр оруулж ирсэн. Үүнийг тодруулж үзэхэд барьцаагүй, баталгаагүй хувийн хэвшилд өгөх гэж байсан. Үүнтэй холбогдуулан санхүүгийн албаны дарга, зохион байгуулсан худалдан авалтын дарга, ерөнхий нягтлан, уул уурхайн газрын дарга, дотоод хяналтын газрын даргаар ажиллаж байсан хүмүүсийг чөлөөлж, АТГ-т шалгуулахаар өгсөн. Төрийн өмч эрсдэлд орох ёсгүй” гэлээ.
Үргэлжлүүлэн ЗГХЭГ-ын дарга Д.Амарбаясгалан “Монгол Улс гадаад валютын нөөцийн хомсдолд орж, цаашлаад эдийн засгийн эрсдэлд орж болохгүй. Тиймээс “Эрдэнэс Тавантолгой” ХК-д БЭТ томилж, үйл ажиллагааг нь сайжруулах, олон нийтийн дунд эргэлзээтэй байгаа асуудлыг тайлагнах, цаашлаад 500 сая доллар татан төвлөрүүлэхээр болсон. Мөн цаашдаа нүүрсний борлуулалтын үйл ажиллагаа болон худалдан авагчтай харилцаж буй бүх үйл ажиллагааг нээлттэй ил тод болгож, уул уурхайн биржийн зарчмаар явагддаг болно. Уурхайн аман дээрээс худалдаалдаг урьдчилсан нөхцөлтэй гэрээг хийхийг хориглосон. Заавал Засгийн газраас зөвшөөрөл авна. Нүүрс худалдах нэг хэрэг, нүүрсийг худалдан аваад тээвэрлээд хил гарган зарж буй нь хоёр дахь асуудал. Нүүрсний үнэ өртгөөс илүүтэй тээвэрлэлтийн үнэ өртөг, түүнд шингээж буй байдал нь ач холбогдолтой болоод байгааг Засгийн газар таслан зогсооно. Бид өөрсдөө хил гаргаж зарна” гэсэн юм.
