Халдварт өвчин судлалын үндэсний төвөөс мэдээлэл хийж байна.
Орон даяар 21 аймаг, 9 дүүргийн өрхийн эрүүл мэндийн төвүүд болон байнгын төвүүдэд томуугийн вакцинжуулалт хэвийн үргэлжилж байгаа аж. Нийт 545 мянган хүн тун вакцинаас 190 мянган тунг хийсэн бөгөөд 35 хувьд нь зорилтот бүлгийн иргэд хамрагдсан байна. Эцэг, эхчүүдэд ялангуяа 5 хүртэлх насны хүүхдүүдээ вакцинжуулалтад хамруулахыг зөвлөж байна.
Халдварт өвчин судлалын төвөөс мөн Covid-19-ийн цар тахлын нөхцөл байдлын талаар мэдээллээ. Аравдугаар сарын сорьцоор Сovid-19 цар тахлын омикрон хувилбарын BF7 хувилбараар 1 хүн, BQ.1.2-оор 5 хүн халдварлаж эмчлүүлж байгаа аж.
BF7 хувилбараар өвчилсөн 72 настай, эрэгтэй, БНХАУ-ын иргэн ОХУ-д ажиллаж байгаад манай улсад ирсэн. Биеийн байдал нь тогтвортой, зочид буудалд тусгаарлагдсан байна.
BQ.1.2-оор өвчилсөн таван иргэн бүгд Монгол Улсын иргэд байна. Дундаж нас нь 58 бөгөөд 3 эрэгтэй, 2 эмэгтэй хүн халдварлаж, хоёр нь эмнэлэгт хэвтэн эмчлүүлж байгаа аж. Эдгээр хүмүүс аравдугаар сарын 18, 19-нд шинжилгээнд сорьцоо өгчээ. Халуурах, хоолой хөндүүрлэх, сэрвэгнэх зэрэг эмнэлзүйн шинжүүд давамгайлж буй юм байна.
